Auglýsingablaðið

Auglýsingablað 1128. tbl. 14. árg. 3. febrúar 2022.

Sveitarstjórnarfundur
581. fundur sveitarstjórnar Eyjafjarðarsveitar verður haldinn í fundarherbergi sveitarstjórnar, Skólatröð 9, fimmtudaginn 10. febrúar og hefst hann kl. 8:00.
Dagskrá fundarins verður kynnt á upplýsingatöflu í anddyri skrifstofunnar og á heimasíðu sveitarfélagsins.

Til félaga eldri borgara
Kæru félagar.
Minnum á félagsstarfið í Félagsborg þriðjudaginn 8. febrúar nk.
Kv. stjórnin.

Minnum á aðalfundinn laugardaginn 5. febrúar kl. 11:00 í Laugarborg
Nýjar konur velkomnar. Hafið samband við Sigríði Ásnýju formann,
í síma 863-6912 eða með tölvupósti á idunn@kvenfelag.is.
Hlökkum til að eiga með ykkur notalega stund.
Kærar kveðjur, stjórn Kvenfélagsins Iðunnar.

Lamb Inn Öngulsstöðum
Við höldum áfram með þriðjudagsfundina okkar.
Þriðjudaginn 8. febrúar kl. 12:00 mætir Brynjar Skúlason skógfræðingur og fjallar um hlutverk skógræktar og landbúnaðar í bindingu kolefnis. Hvað gera bændur nú? Léttur hádegisverður kaffi og kaka á 2.500. Pantanir í síma 463-1500 eða á lambinn@lambinn.is.

Aðalfundur Vatnsveitu Staðarbyggðar verður haldinn miðvikudaginn 9. febrúar kl. 20:30 í Kaffi Kú.
Dagskrá: Venjuleg aðalfundarstörf skv. lögum félagsins.
Stjórnin.

Lionsklúbburinn Sif – Hittumst eldhressar 9. febrúar :-)
Minnum á fundinn miðvikudaginn 9. febrúar í Félagsborg,
mæting kl. 19:30 og fundur hefst kl. 20:00.
Á dagskrá er m.a. fræðsluerindi um siðameistara og inntökuathöfn.
Áhugasamar konur um félagsaðild, sendi endilega tölvupóst á lions.hronn@gmail.com.
Margt skemmtilegt framundan eins og Góugleði í mars, Rauða fjöðrin í apríl, Hveragerði í maí o.s.frv., o.s.frv.

Örsýning Verk á vegg - Á Þorra
Guðrún Steingrímsdóttir opnaði sýningu sína „Á Þorra“ í Dyngjunni-listhúsi sunnudaginn 30. jan. sl. Verkin á sýningunni eru unnin úr hornum íslenskra dýra. Sýningin er opin út febrúar á opnunartíma Dyngjunnar-listhúss.

Í vetur hef ég boðið vinkonum mínum að sýna verk á vegg. Um er að ræða mánaðarlegar örsýningar. Opnunartími fylgir opnunartíma Dyngjunnar-listhús.

Gígja Þórarinsdóttir reið á vaðið, en hún sýndi 3 akrílmyndir, í október, í nóvember var Dagrún Mattíasdóttir með kattamyndir og Beate Stormo í desember þar sem hún kynnti kúna Eddu og sýndi hluta af henni. Núna 2022 er Guðrún Steingrímsdóttir í febrúar, Lene Zachariassen í mars, Jenný Karlsdóttir í apríl og lestina rekur svo Surekha Datye í maí.

Verið velkomin, Hadda.

Þorrablót 2022
Rafræna þorrablótsnefndin þakkar kærlega fyrir sig! Við gleðjumst yfir jákvæðum viðbrögðum í netheimum og vonum að allir hafi skemmt sér vel. Síðast en ekki síst þökkum við styrktaraðilum kærlega fyrir og öllum þeim fjölmörgu sem gáfu okkur happdrættisvinninga – ómetanlegt að eiga svona góða sveitunga að :-)
Nefndin mun hafa samband vegna happdrættisvinninga á næstu dögum, bæði við þá sem gáfu vinninga sem og þá sem hlutu vinninga. Svo þið þurfið ekkert að gera :-)
Svo hlökkum við óskaplega til að mæta á hefðbundið þorrablót að ári og borða, knúsast, dansa og syngja. Við erum sannfærð um að nýkjörin þorrablótsnefnd muni standa fyrir ógleymanlegri kvöldstund!!
Takk fyrir okkur – yfir og út!!