Auglýsingablaðið

Auglýsingablað 1180. tbl. 15. árg. 15. febrúar 2023.

Árshátíð miðstigs 2023
Árshátíð miðstigs Hrafnagilsskóla verður haldin í Laugarborg, fimmtudaginn 16. febrúar kl. 19.00.

Dagskráin hefst á tónlistaratriði frá Tónlistarskóla Eyjafjarðar. Að því loknu sýna nemendur í 5., 6. og 7. bekk stytta útgáfu af leikritinu Konungi ljónanna sem byggt er á teiknimyndinni Lion King.
Að loknum skemmtiatriðum verður boðið upp á hressingu. Síðan verður stiginn dans undir tónlist sem nemendur á miðstigi hafa valið af kostgæfni og það er aldrei að vita nema Elín Halldórsdóttir danskennari komi við og kenni okkur réttu sporin.

Skemmtuninni lýkur kl. 21.30. Aðgangseyrir er 1.500 kr. fyrir 16 ára og eldri, 500 kr. fyrir börn á grunnskólaaldri (aðrir en sýnendur) og frítt fyrir þá sem yngri eru. Allur ágóði fer í sjóð sem greiðir niður lyftugjöld í skíðaferð og einnig fá 7. bekkingar niðurgreiðslu þegar þeir fara í skólabúðirnar á Reykjum.
Athugið að ekki er posi á staðnum.
Veitingar eru innifaldar í verðinu og sjoppa verður á staðnum.
Allir eru hjartanlega velkomnir!
Nemendur 5.-7. bekkjar Hrafnagilsskóla.

Kæru Funafélagar
Aðalfundur félagsins verður haldinn í Funaborg 16. febrúar kl. 20.00.
Dagskrá fundarins: Venjuleg aðalfundarstörf.
Ef einhverjir eru áhugasamir að starfa í nefndum félagsins endilega hafið samband í þetta netfang hafdisds@simnet.is.
Veitingar í boði. Stjórn Funa.

Kvenfélagið Aldan - aðalfundarboð
Aðalfundur kvenfélagsins Öldunnar verður haldinn í Laugarborg laugardaginn 18. febrúar kl. 11.00.
Venjuleg aðalfundarstörf. Stjórnin sér um veitingar.
Nýjar konur hjartanlega velkomnar.
Stjórnin.

Handverksmessa í Saurbæjarkirkju sunnudaginn 19. febrúar kl. 13.00
Kirkjukór Laugalandsprestakalls flytur sálma sem samdir voru af konum í tilefni konudagsins undir stjórn Þorvaldar Arnar Davíðssonar organista. Kolbrún Ingólfsdóttir handverkskona flytur erindi. Prestur er Jóhanna Gísladóttir og meðhjálpari Auður Thorberg.
Tilvalið að taka prjónana með til messu.
Vöfflukaffi í Sólgarði eftir samveruna í tilefni dagsins.
Verið öll velkomin!

Frá Félagi eldri borgara í Eyjafjarðarsveit
Þriðjudaginn 21. febrúar um kl. 14.00 mun Hörður Geirsson hjá Minjasafninu mæta til okkar í Félagsborg.
Ætlar hann sýna okkur myndir og spjalla um ýmislegt gamalt og gott.
Stjórnin.

Iðunnarkvöld - fimmtudaginn 16. febrúar kl. 20.00
Þessi Iðunnarkvöld, eru einu sinni í mánuði yfir vetrartímann.
Þá komum við Iðunnarkonur saman kl. 20.00 í fundarherbergi Laugarborgar (dyrnar hægra megin við aðalinnganginn).
Nýjar konur velkomnar – mjög góð leið til að kynnast konum í sveitinni ;-)
Kvenfélagið Iðunn.

Kaffispjall með fulltrúum sveitarstjórnar – 22. febrúar kl. 20.00
Íbúum og þeim sem áhuga hafa býðst tækifæri til að koma í kaffispjall með fulltrúum sveitarstjórnar og formanni velferðar- og menningarnefndar
kl. 20.00 miðvikudaginn 22. febrúar í Félagsborg.
Kjörið tækifæri til að ræða ýmis mál við fulltrúa sveitarstjórnar.

VILTU VERÐA HRESS GÖMUL KERLING?
Hvernig: Koma á byrjendanámskeið í yin yoga.
Hvenær? Hefst föstudaginn 3. mars 2023. Á föstudögum kl. 10.30.
Fyrir hverja: Fyrir konur 50+
Lengd: 6 skipti
Verð: 12.000 kr.
Í Yin Yoga er unnið með liðleika og líkamsstöður. Við höldum álagi/stöðu í 1-3 mín. Lærum að skynja skilaboð frá líkamanum og nota síðan huga og öndun til þess að ná fram meiri liðleika og góðri slökun í djúpvefi líkamans. Þóra leiðir yin yoga tímana með áherslu á sjálfsmildi og kærleiksríka nærveru.
Skráning í pm Jóga á Jódísarstöðum, á thorahjor@gmail.com eða í s. 898-3306.
Namaste, Þóra Hjörleifsdóttir.

Konudagurinn nálgast !!!
Snyrtistofan Sveitasæla býður upp á allt það sem konunni dreymir
um þegar kemur að dekri. Gefðu elskunni þinni gjafabréf á konudaginn. Til að nálgast gjafabréf er best að hafa samband í síma 833-7888. Nánari upplýsingar um meðferðir og verð eru á facebooksíðu Sveitasælunnar undir liðnum: þjónusta. Er einnig með geggjaða gjafapakkningu sem inniheldur body cream og sturtusápu með dásamlegu Tranquility lyktinni sem allir elska. Tímapantanir eru á noona appinu og í síma 833-7888.
Elín Halldórsdóttir snyrtifræðingur.