Skipulagsnefnd

454. fundur 17. ágúst 2026 kl. 09:00 - 11:20 Fundarstofa 2, Skólatröð 9

Nefndarmenn

Hákon Bjarki Harðarson
Dagný Linda Kristjánsdóttir
Reynir Sverrir Sverrisson
Heiðdís Pétursdóttir
Friðrik Karlsson

Starfsmenn

Jón Björn Hákonarson sveitarstjóri
Arnar Ólafsson skipulags- og byggingarfulltrúi

Fundargerð ritaði: Arnar Ólafsson skipulags- og byggingarfulltrúi

Dagskrá:

1. Aðalskipulag Eyjafjarðarsveitar endurskoðun 2022 - E2210043

Fyrir fundinum liggja uppfærð gögn vegna endurskoðunar Aðalskipulags Eyjafjarðarsveitar. Málið var síðast tekið fyrir á fundi sveitarstjórnar 18. júní 2026, þar sem fjallað var um athugasemdir HMS við tillöguna og jafnframt gerðar athugasemdir samkvæmt minnispunktum skipulagsnefndar við greinargerð og yfirferð HMS. Skipulagshönnuði var þá falið að vinna úr framkomnum athugasemdum. Fyrirliggjandi gögn hafa nú verið uppfærð í samræmi við þær.

Skipulagsnefnd leggur til við sveitarstjórn að uppfærð tillaga að Aðalskipulagi Eyjafjarðarsveitar verði samþykkt og auglýst skv. 31. gr. skipulagslaga nr. 123/2010.

2. Brúarland (ÍB 15) - breytingar á skilgreiningu í ASK og greinargerð DSK - E2501006

Auglýsingu tillögu að breytingu á Aðalskipulagi Eyjafjarðarsveitar 2018-2030 vegna Brúarlands (ÍB15) og breytingu á deiliskipulagi íbúðarbyggðar Brúnagerðis, áfanga A og B, lauk 20. júní 2026. Alls bárust 16 athugasemdir á auglýsingartíma um aðalskipulagsbreytinguna og 15 umsangir um deiliskipulagsbreytinguna og liggja þær nú fyrir til umfjöllunar.

Aðalskipulagsbreyting:

1. erindi, sendandi Minjastofnun:

Umsögn: Engar menningarminjar sáust á svæðinu við úttekt minjavarðar árið 2021 og gerir Minjastofnun ekki athugasemd við fyrirhugaðar skipulagsbreytingar. Rétt er að vekja athygli á 2. mgr. 24. gr. laga um menningarminjar nr. 80/2012 en þar segir:

Ef fornminjar sem áður voru ókunnar finnast við framkvæmd verks skal sá sem fyrir því stendur stöðva framkvæmd án tafar. Skal Minjastofnun Íslands láta framkvæma vettvangskönnun umsvifalaust svo skera megi úr um eðli og umfang fundarins. Stofnuninni er skylt að ákveða svo fljótt sem auðið er hvort verki megi fram halda og með hvaða skilmálum. Óheimilt er að halda framkvæmdum áfram nema með skriflegu leyfi Minjastofnunar Íslands.

Afgreiðsla skipulagssnefndar: Athugasemd gefur ekki tilefni til breytinga á tillögunni

2. erindi, sendandi Þóra Sólveig Bergsteinsdóttir:

Umsögn: Opið bréf til sveitarstjórnar frá íbúum, land- og lóðaeigendum í landi Leifsstaða og Brúarlands vegna skipulagsmála í Brúnagerði. Það eru margar framkvæmdir í gangi nálægt okkur í hverfinu og hafa verið s.l. 3 ár og mikið er byggt. En eins og ekki allir vita eru langt komin áform um að gjörbreyta stórum hluta af Vaðlaheiði og Kaupangsveit og þar með að gera fallega hverfið okkar að túristasvæði með gistipláss fyrir yfir 600 manns. Ekki er þá talið með hótel hjá Skógarböðunum, heldur gistiþjónusta hjá Leifsstöðum II sem vill breyta aðalskipulagi til að fjölga úr 150 gistiplássum í 400, með öðru stóru hóteli sem mun koma fyrir framan Leifsstaðarhúsið sem á einnig að stækka, og 46 frístundahús í kring. Í Brúnagerði er núna reist nýtt 13 húsa íbúðarhverfi með einbýlishúsum en eigandi vill breyta skipulagi úr íbúðarbyggð í verslunar- og þjónustusvæði með orlofsþorpi. Og er einnig kominn með áætlanir til að halda áfram að byggja fyrir ofan Brúnahlíð (hugsanlega líka með það markmið að gera orlofsþorp með samtals 22 orlofshúsum, fyrir 176 manns). Þessi fyrirhugaða breyting skipulags í verslunar- og þjónustusvæði hefur mun meiri óafturkræf neikvæð áhrif, þá er jafnvel hægt að byggja hótel, skemmtistað eða búðir á þessu svæði. Ef þetta verður allt leyft þá er veruleikinn að Vaðlaheiði og Kaupangur stór breytist frá hágæða, búsetuvænni íbúabyggð með sveitayfirbragði og verður eins konar Hálönd í staðinn, með allt ónæði sem því fylgir. Allt þetta er í algjöru ósamræmi við rammaáætlun og skipulag sem er núna í ferli (gert í samráði við alla íbúa og landeigendur í Vaðlaheiði og Kaupangsveit s.l. 3 ár). Og það bara fyrir hagnað einkafyrirtækis og fjárfesta. Þetta hefur ekki bara áhrif í okkar hverfi; ef þetta verður leyft, jafnvel í ósamræmi við skipulag, þá er komið (mjög slæmt) fordæmi og hægt verður að gera þetta alls staðar í sveitinni. Ef þessu verður breytt í verslunar- og þjónustusvæði þá eru nefnilega miklar líkur á að sama aðferð verður notuð fyrir ofan og 9 svona hús byggð í viðbót og Brúnahlíð umkringd orlofsþorpi. Það er engin trygging fyrir því að Heiðin muni reka þetta til lengri tíma eða með bara 30% nýtingu. Ef vel gengur er það 100% á sumrin. Ekki er heldur tryggt að þetta verði ekki selt eftir einhvern tíma. En ef þetta er þá orðið verslunar- og þjónustusvæði getur hvað sem er verið byggt. Ekki er heldur nein trygging að fyrirtækið muni ekki selja þetta til stéttarfélaga/ fyrirtækja eftir samþykki skipulagsbreytingar. Það er barnalegt að trúa orðum fyrirtækis sem ekki hefur staðið við neitt frá því 2022 og ítrekað notað allskonar brögð til að koma áformum sínum í gegn/framhjá reglugerðum. Ekki verður einungis ónæði, aukin umferð, umhverfis- og hávaða truflanir af stöðugu streymi ferðamanna um svæðið, heldur mun eftirsókn og verðgildi íbúða og íbúðarlóðanna í kring hríðfalla. Við krefjumst þess að sveitarstjórn hætti við að halda áfram með umsókn (sem nýlega var hafnað af Skipulagsstofnun) sem fer á móti þessari nýlega gerðu rammaáætlun og skipulagi (sem var gert vandlega eftir langa vinnu samkvæmt óskum allra íbúa og landeigenda í kring). Og á sama tíma er nauðsynlegt að fylgjast mjög vel með IB 27, (nefnt efra svæði Brúarlands í síðustu umfjöllun) þar sem Heiðin II ehf. ætlar að byggja 9 ´íbúðarhús´ í viðbót. Samantekt um merkilegar breytingar á stefnu sveitarstjórnar. 10. desember 2025 var komið svar frá Skipulagsstofnun við umsókn um breytingu á aðalskipulagi vegna Brúarlands (ÍB 15). Sem er eins og hér stendur: Skipulagsstofnun hefur farið yfir framlögð gögn og bendir á eftirfarandi atriði: Eins og fram kom í umsögn stofnunarinnar um lýsingu, dags. 3. apríl 2025, telur stofnunin ekki tímabært að fara fram með breytinguna sem er ekki í samræmi við nýlega samþykkta stefnu sveitarstjórnar eins og hún er sett fram í breytingu á rammahluta aðalskipulags, Þróun byggðar í Vaðlaheiði, fyrir sama svæði og borist hefur stofnuninni til staðfestingar. Þar er gert ráð fyrir að íB-15 sé óbreytt. Ekki er hægt að samþykkja og kynna breytingu á þeirri stefnu fyrr en að lokinni staðfestingu rammahlutans. Þá er bent á að gera þyrfti samhliða breytingu á ákvæðum gildandi deiliskipulags fyrir íbúðarbyggð í Brúnagerði, áfangi A og B frá árinu 2022. Stofnunin bendir á mikilvægi þess að kynna vel fyrirhuguð áform fyrir öllum hagsmunaaðilum og æskilegt er að vinna samhliða að breytingu á aðalskipulagi og deiliskipulagi sbr. ofangreint 15 janúar 2026 (668. fundur sveitarstjórnar) var niðurstaðan þessi: Skipulagsnefnd tók erindið fyrir á 444. fundi sínum og leggur til við sveitarstjórn að skipulagsfulltrúa verði falið að hafa umsjón með áframhaldandi vinnslu málsins þegar rammahluti aðalskipulags hefur öðlast gildi í samræmi við fyrri ákvörðun sveitarstjórnar. Sveitarstjórn samþykkir samhljóða að skipulagsfulltrúa verði falið að hafa umsjón með áframhaldandi vinnslu málsins þegar rammahluti aðalskipulags hefur öðlast gildi í samræmi við fyrri ákvörðun sveitarstjórnar. Við skiljum ekki þessa niðurstöðu sveitastjórnar um að aftur senda umsókn til að reyna að breyta aðalskipulagi í ósamræmi við nýlega gerðan rammahluta aðalskipulags strax eftir að það er staðfest. Og leyfa skipulagsfulltrúa einum að sjá um það, sérstaklega þegar við lítum á fundargerðir skipulagsnefndar og sveitarstjórnar; Þetta var sagt á 643. fundi Sveitarstjórnar 21. nóvember 2024 kl. 08:00 - 10:40 12. 2410022 - Sýslum. á Norðurl.eystra óskar eftir umsögn - Heiðin ehf. Rekstrarleyfi gistingar vegna Brúnagerði 2 og 4 Sveitarstjórn hefur kannað afstöðu næstu nágranna til fyrirhugaðs gistirekstur þar sem fram komu nokkur andmæli við fyrirætlanir Heiðarinnar ehf. Fyrr á árinu hefur sveitarfélagið haft til umfjöllunar erindi frá sama umsækjanda, um gistingu í húsum númer 3 og 5 og stærri áform um gistirekstur í nærfellt öllum húsum við götuna og liggja því fyrir ítarlegar gögn og upplýsingar um áform umsækjanda og umsagnir hagsmunaaðila, m.a. á fundi með hagsmunaaðilum. Sveitarstjórn veitti neikvæða umsögn um fyrri áform en fjallar nú um nýja umsókn um rekstur á öðrum forsendum með rekstur í aðeins tveimur húsum. Þar sem Heiðin ehf. hefur lýst því yfir að félagið hafi fallið frá áformum sínum um rekstur í nærfellt allri götunni snýr málsmeðferð sveitarfélagsins eingöngu um umsögn gistireksturs í Brúnagerði 2 og 4. Jákvæð ummæli hafa borist á fyrri stigum frá þeim aðila sem verður fyrir mestum grenndaráhrifum af rekstri í umræddum húsum. Ekki er talið að neikvæð áhrif vegna gistireksturs í umræddum tveimur húsum geti orðið veruleg hjá þeim aðilum sem skilað hafa inn neikvæðum umsögnum á þessu stigi né hjá öðrum. Fyrirhuguð áform eru minniháttar gistirekstur. Vegna fordæma í öðrum íbúðarbyggðum í sveitarfélaginu þar sem afmörkuð minniháttar gististarfsemi hefur verið heimiluð, þá telur sveitarstjórn það stríða gegn meðalhófsreglu og ekki séu gild rök til að veita neikvæða umsögn vegna leyfis til gistireksturs í Brúnagerði 2 og 4. Sveitarstjórn gerir því ekki athugasemd við fyrirhugaðan gistirekstur í Brúnagerði 2 og 4. Semsagt: það er farið frá: ´engin gisting leyfð´ (sem er rétt samkvæmt skipulagi og rammahluta) til: ´minniháttar gistirekstur. vegna fordæma í öðrum íbúðarbyggðum í sveitarfélaginu þar sem afmörkuð minniháttar gististarfsemi hefur verið heimiluð í 2 húsum. Svo kemur 7. janúar 2025 ekki nema 7 vikum seinna erindi frá fyrirtækinu um að breyta skipulagi og leggja allt svæðið undir gistingu; 423. Fundur skipulagsnefnd 13. janúar 2025 kl. 08:00 - 10:00 1. Brúarland (ÍB 15) og Brúarland efra svæði (L) (SL), breytingar á skilgreiningu í ASK - 2501006 Fyrir fundinum liggur erindi dags. 7.janúar 2025, frá Ingólfi Fr. Guðmundssyni hjá Kollgátu ehf. f.h. eiganda að jörðinni Brúarland; Heiðin Fasteignir ehf. og Heiðin Fasteignir II ehf. þar sem óskað er eftir leyfi skipulagsyfirvalda til breytinga á skilgreiningu á landi Brúarlands í núgildandi aðalskipulagi. Annars vegar er um að ræða svæði sem eru í dag í byggingu (ÍB15) sem íbúðarhúsasvæði en þar er óskað er eftir breytingu yfir í VÞ. Hins vegar er um að ræða efra svæðið sem er í dag skógræktar- og landbúnaðarsvæði en óskað er eftir breytingu yfir í íbúðarhúsasvæði. Deiliskipulag yrði síðan unnið fyrir efra svæðið í kjölfarið skv áður innsendum drögum. Skipulagsnefnd leggur til við sveitarstjórn að landeiganda verði heimilað að hefja skipulagsferli á breytingu hluta ÍB 15 í VÞ samkvæmt meðfylgjandi gögnum og leggja fyrir tillögu að aðalskipulagsbreytingu. Skipulagshönnuði er bent á að efra svæðið sem er í dag skógræktar- og landbúnaðarsvæði og óskað er eftir breytingu yfir í íbúðarhúsasvæði er þegar í ferli í rammahluta aðalskipulags. 645. fundur sveitarstjórnar 16. janúar 2025 kl. 08:00 - 09:30 Fundarstofa 2, Skólatröð 9 Sveitarstjórn samþykkir tillögu skipulagsnefndar og heimilar landeiganda að leggja fyrir sveitarstjórn tillögu að aðalskipulagsbreytingu á hluta ÍB 15 í VÞ til samræmis við fram lögð gögn. Skipulagshönnuði er bent á að efra svæðið, sem er í dag skógræktar- og landbúnaðarsvæði og óskað er eftir breytingu yfir í íbúðarhúsasvæði, er þegar í skipulagsferli í rammahluta aðalskipulags. Þetta kemur minna en 2 mánuðum eftir að það var talað um minniháttar gistirekstur og að hætta við að hafa gistingu í öllum húsunum. Hérna er fyrirtækið fallega sagt klárlega að plata íbúa og landeigendur og það með meðvirkni skipulagsnefndar og sveitarstjórnar. Í ljósi þessa höfum við lítið traust á áframhaldandi vinnslu málsins af skipulagsfulltrúa eins og sveitarstjórn leggur nú til. Með því að breyta skipulagi í þjónustu- og verslunarsvæði er verið að leyfa gistingu í öllum 13 húsunum. Með þeim afleiðingum að þetta verður breytt frá íbúahverfi í orlofsþorp fyrir 104 manns. Sem er engan veginn ´takmarkaður minniháttar gistirekstur´ lengur. Sem haf ´engin veruleg neikvæð áhrif´. Þetta er líka í ósamræmi við rök sem fyrirtækið notaði sjálft í umsókn sinni til að fá rekstrarleyfi fyrir þennan ´minniháttar gistirekstur´ samþykkt af sveitarstjórn; Sýslumaður hefur óskað umsagnar sveitarfélagsins varðandi umsókn um gistirekstur við götuna Brúnagerði í Brúarlandi. Húsin eru númer 2 og 4. Í tengslum við erindið hefur Heiðin ehf. sent sveitarstjórn bréf þess efnis að félagið hafi fallið frá áformum þess um gistirekstur í öllum húsum götunnar eins og áður stóð til. Telja forsvarsmenn félagsins í ljósi fyrri afgreiðslu sveitarstjórnar að félagið geti í öllu falli ekki farið í skammtímaleigurekstur eins og lagt hafi verið upp með í upphafi. “ Svo er Heiðin II ehf að óska eftir að breyta landi fyrir ofan Brúnahlíð í íbúðarhúsasvæði´ en enginn veit hvað það verður. Það er ekki óhætt að segja að kannski verður byggt annað orlofsþorp undir sömu fölskum forsendum beint fyrir ofan Brúnahlíð. Umsókn er fyrir 9 ´íbúðarhús´. Og þá verður þetta 22 orlofshús með gistipláss fyrir 176 manns fyrir ofan og sunnan við Brúnahlíð og 150 metra fjarlægðarmörk sem gildir fyrir frístundahús ekki virt. Þetta fyrirtæki og landeigandi virðast ekki geta hætt að sækja um eitthvað sem þau vilja svo ekki og allskonar brögð eru notuð, og meira að segja bréf skilið sem hótunarbréf sent til íbúa í Brúnahlíð um að gera þetta enn verra fyrir íbúa með að selja þetta til fyrirtækja og stéttarfélaga til nota sem orlofshús ef þau hætta ekki að mótmæla áformunum. (En enginn getur ábyrgst að þau selji ekki samt eftir að skipulagsbreyting yrði samþykkt). Núna er Skipulagstofnun sem sagt búin að segja nei við umsókn um að breyta skipulagi en sveitarstjórn ætlar samt að halda áfram með ferlið. Ætlar sveitarstjórn virkilega að gera allt í sínu krafti til að koma til móts við fyrirtækið? Þetta er 180° breyting á stefnu á minna en 2 mánuðum, án nokkurrar útskýringar í opinberri fundarskýrslu. Þetta er eiginlega mjög einfalt mál: þetta hverfi var og er byggt undir skipulagi og leyfi sem íbúahverfi og einbýlishús samkvæmt áætlun fyrirtækisins gert af Kollgátu. Að fyrirtækið kjósi svo að full innrétta þessi hús fyrir 8 manna gistiþjónustu og byggja 5 til viðbótar áður en leyfi er komið fyrir skammtímagistingu er fullkomlega á þeirra eigin ábyrgð og á ekki að bitna á nágrönnum og vel unninni rammaáætlun með heildar framtíðarsýn fyrir sveitina. Það var jafnvel gengið á milli húsa við vinnsluna og undarlegt að Heiðin hafi ekki komið sínum áformum á framfæri því allir landeigendur fengu að segja hvað þeir vildu. Rökin fyrir skipulagsbreytingu (sem fékk núna afvísun) voru frekar slöpp og sum hreint út sagt ekki einu sinni sönn (að fyrirtækið hafi leigt út hús sem gekk vel og vilji auka starfssemi, á þessum 7 vikum á milli umsókna þá?): ´það “vantar gistipláss? í sveitinni´ Maður getur spurt sig hversu mikið þarf að fórna fyrir atvinnugrein sem er i minnkun. Síðustu ár hafa mörg hótel byggt við eða stækkað, sem er bara flott, nefna má hótel Akureyri, Hilton Hotel og stórt hótel kemur hjá Skógarböðunum, 1 km frá Leifsstöðum (sem hefur líka stækkað til muna). En frá því 2018 hefur fjöldi ferðamanna ekki aukist, fer jafnvel minnkandi þó fleiri gistiherbergi hafi bættst við. Á veturna (september-maí) eru flest hótel á Norðurlandi hálf tóm, og margir jafnvel loka í nokkra mánuði. Þetta er varla grunnur til að breyta heilu íbúahverfi með 13 einbýlishúsum í verslunar-og þjónustusvæði með gistingu, fara á móti stefnu rammaáætlunar Eyjafjarðarsveitar og Svalbarðsstrandahrepps og ekki minnst að hunsa allar ábendingar sem voru þegar komnar fram á íbúafundi og af sveitastjórn í september 2024 þegar áætlanir fyrir gistiþjónustu voru komnar í ljós. “þetta er að mestu leyti komið?. Er líka ógilt og þýðir að það greinilega marg borgar sig að fara aftan að kerfinu í Eyjafjarðarsveit (sem er eins og sveitastjórn er sjálf búin að benda á bara mjög slæmt fordæmi). Síðustu 5 af 13 húsunum eru nefnilega byggð eftir að fyrirtækið sagðist hætta við hugmyndina um gistingu í öllum húsum, og fékk leyfi fyrir bara ´minniháttar gistingu ´ þegar einungis 8 hús voru komin og ekki öll fullinnréttuð. Í september 2024 þegar í ljós var komið að það var mikil mótstaða var ekki einu sinni komið byggingarleyfi fyrir nokkur hús í áfanga B. Það hefði verið skiljanlegt að leyfa minniháttar gistirekstur í Brúnagerði 2 og 4 og breyta svo hinum 6 húsunum í íbúðarhús eins og leyfið var fyrir, en að breyta gjörvöllu skipulagi og forsendum íbúabyggðarinnar til að hafa 22 húsa orlofsþorp skiljum við hinsvegar alls ekki? Þessi hugmynd gjörbreytir forsendum skipulags fyrir Kaupang og Vaðlaheiði um hágæða og búsetuvæna íbúabyggð með dreifbýlisyfirbragði og ofaná það munu allar úthlutaðar íbúðarlóðir 2024 og 33% af úthlutuðum lóðum 2025 í allri Eyjafjarðarsveit gufa upp og uppsöfnuð þörf íbúða í húsnæðisáætlun Eyjafjarðarsveitar 2025 tvöfaldast. Ekki verður einungis ónæði, aukin umferð, umhverfis- og hávaða truflanir af stöðugu streymi ferðamanna um svæðið heldur mun eftirsókn og verðgildi íbúða og íbúðarlóðanna í kring hríðfalla. Með allt þetta í huga skiljum við alls ekki af hverju skipulagsnefnd og sveitarstjórn eins og stendur kýs enn að halda áfram með fyrirhugað ferli um að stórbreyta skipulagi (og húsnæðisáætlun!). Á móti öllu sem þau kusu sjálf. Við erum líka hissa á að Kollgáta, fyrirtæki sem er með arkitekt sem er ráðherra í núverandi ríkisstjórn er meðvirkt í þessu braski; Arkitektinn (Ingólfur Fr. Guðmundsson) sem var á íbúafundinum í september 2024 þar sem allir á staðnum voru alveg á móti þessu, fullvissaði íbúa á þessum fundi að þetta væru einbýlishús. Að þessi arkitekt er svo að skrifa plan til að sækja um að breyta öllu í orlofsþorp bara 3 mánuðum seinna eftir alla mótstöðu finnst okkur alveg óskiljanlegt. Að breyta öllu svæðinu er ekki lengur bara að fylgja meirihluta fordæmi og minniháttar gistiþjónustu. Arkitekt frá Kollgátu sagði á íbúafundi í sept. 2024 að þetta væru íbúðarhús og líka í nóvember 2024 til að fá byggingarleyfið fyrir síðustu húsin. Það er þá byggt heilt orlofsþorp undir fölskum forsendum. Síðustu 5 byggð langt eftir allar ábendingar sveitarstjórnar og íbúa og landeigenda í kring (áfangi B). Svo er þetta líka merkilegt: https://www.esveit.is/eyjafjardarsveit/stjornsysla/skjol-og-utgefid-efni/fundargerdir/ skipulagsnefnd/2535 8. Brúarland - fyrirspurn um aðalskipulagsbreytingu 2022 - 2206002 Fyrir fundinum liggur erindi frá Ingólfi Guðmundssyni hjá Kollgátu sem fyrir hönd eigenda Brúarlands, Sveins Bjarnasonar og Heiðarinnar ehf., óska eftir að landnotkunarflokki hluta Brúarlands verði í aðalskipulagi breytt úr landbúnaðarlandi og skógræktar- og landgræðslusvæði í frístundabyggð. Skipulagsnefnd leggur til við sveitarstjórn að erindinu sé hafnað, enda samræmast ekki áformin ákvæðum aðalskipulags um að 150 m skuli vera milli íbúðar- og frístundasvæða. Við getum ekki verið sammála þessum fyrirhuguðu breytingum, og það á ekki að borga sig að komast upp með það. Svo eru eins og fyrr sagt komnar áætlanir frá Heiðin fasteignir II ehf. til að byggja meira fyrir ofan Brúnahlíð. Örugglega fleiri íbúðarhús sem eru ekki íbúðarhús, meira af því sama. Það er ekki of seint fyrir sveitarstjórn og skipulagsnefnd að hætta þessari meðvirkni. Þetta grefur undan öllu gildi skipulags og reglugerða. Við krefjumst þess að sveitarstjórn hætti við að halda áfram með umsókn sem fer á móti nýlega gerðri rammaáætlun og skipulagi sem er gert eftir mikla vinnu síðustu ára samkvæmt óskum allra íbúa og landeigenda í kring (þar með talinn landeiganda Brúarlands/Brúnagerði). Virðingarfyllst, Þóra Sólveig Bergsteinsdóttir og Erwin van der Werve, Iceland Yurt ehf. Leifsstaðabrúnum 14. Bergsteinn Gíslason, Leifsstaðabrúnir ehf., Leifsstaðabrúnum 15, landeigandi Leifsstaðir. Benedikt Helgason og Sigríður Helgadóttir Leifsstaðabrúnum 12 Heimir Magnússon, Hrím ehf. Leifsstaðabrúnum 13a Skúli Magnússon, Klöpp í Leifsstaðabrúnum Eyjafjarðarsveit, 17.febrúar 2026

Afgreiðsla skipulagssnefndar: Í aðalskipulagi eru stífir skilmálar er varða skiptingu lands, breytingu á landnotkun og heimild til uppbyggingar. Vaðlaheiði er eftirsóknarverður staður til uppbyggingar fyrir ýmsar sakir m.a. með hagkvæmni að leiðarljósi, stöðu innviða og staðsetningu. Með því að beina uppbyggingu þar sem byggð er fyrir og landi hefur verið raskað er tekið tillit til umhverfissins, ákvæða skipulagslaga- og reglugerða og tilmæla í landsskipulagsstefnu.

Rammahluti aðalskipulags fyrir Vaðlaheiði nær til íbúðar- og frístundabyggðar og tekur því ekki til verslunar- og þjónustusvæða, ekki er mögulegt að gera breytingu á aðalskipulagi á svæði sem er þegar í ferli, því þurfti að ljúka skipulagi rammahlutans áður en mögulegt var að skilgreina svæðið sem verslunar- og þjónustusvæði.

Skipulagsbreytingin er unnin og afgreidd samkvæmt skipulagslögum með auglýsingu og umsagnarfresti. Samhliða aðalskipulagi er unnið deiliskipulag þar sem eru settir skilmálar um landnotkun, umfang bygginga/starfsemi, aðkomu/umferð, lýsingu, umgengni og frágang, ásamt vatns- og fráveitumálum.

Framkvæmdin er ekki fordæmisgefandi og ekki verður heimiluð frekari uppbygging á reitnum nema sveitarstjórn telji þörf á frekari uppbyggingu á svæðinu.

Öll hús sem byggð eru skv. deiliskipulagi uppfylla staðla sem íbúðarhús. Skv. skipulagslögum skal landnotkun í aðalskipulagi endurspegla megin nýtingu á viðkomandi svæði, en það útilokar ekki búsetu á svæðinu. Gangi áform rekstraraðila ekki upp er ekkert til fyrirstöðu um að hefðj breytingu á skipulagi og skilgreina svæðið sem íbúðarbyggð.

Áhyggjur af grenndaráhrifum eru teknar til hliðsjónar við útgáfu framkvæmda- og byggingarleyfa og við framtíðarþróun svæðisins.

Athugasemd gefur ekki tilefni til breytinga á tillögunni.

3. erindi, sendandi Þóra Sólveig Bergsteinsdóttir:

Fólk er orðið mjög þreytt og það er nú þegar komið tal í hverfinu um að flytja bara í burtu (og nokkrir hafa nú þegar flutt). Við bætum líka við opnu bréfi sent 17.febrúar 2026 til sveitarstjórnar frá meirihluta íbúa Leifsstaðabrúna sem er og verður fyrir mestum áhrifum ef þetta verður leyft.

Það þarf að rannsaka hljóðvist og önnur grenndaráhrif eins og umferð, myrkurgæði og vatns- og fráveitumál. Lækur hefur yfirfyllst af jarðvegi og ræsi hafa stíflast við Leifsstaðabrúnir vegna ófullnægjandi frágangs jarðvegs við stórtæka endurmótun landslagsins. Landbúnaðarland var endurmótað í háa stalla og sprengingar á klöpp sem leiddi til þess að vatn leitar í nýjan farveg gegnum eign, kjallara og innkeyrslu í Leifsstaðabrúnum 14.

Við tengingu hverfisins fór vatnsbúskapur einnig úr skorðum á eigninni og er enn vandamál.

Þann 17. febrúar 2026 var sveitarstjórn sent opið bréf með fjölda undirskrifta íbúa. Þrátt fyrir ítrekanir í apríl hefur sveitarfélagið hvorki svarað bréfinu né rökstutt drátt á afgreiðslu, sem er brot á 9. gr. stjórnsýslulaga nr. 37/1993.

Íbúar í Brúnahlíð hafa verið beittir þrýstingi af hálfu framkvæmdaraðila (Heiðin fasteignir ehf.) með hótunarbréfi um skaðabætur. Jafnframt hefur framkvæmdaraðili boðið íbúum malbikun á hverfið gegn því að þeir andmæli ekki breytingu á landnotkun.

Við teljum það forkastanlegt að sveitarstjórn byggi skipulagsákvarðanir á samþykki sem fengið er með nauðung eða í skiptum fyrir opinbera innviði. Ekki var reynt að hafa samráð við íbúa í Leifsstaðabrúnum sem eru beint fyrir neðan (öll húsin vísa þangað) og verða fyrir mestum áhrifum af þessum áformum. Hús á svæðinu voru reist undir yfirskini einbýlishúsa en eru hönnuð sem stórtæk orlofshús, (8 manna gistieiningar með yfirbyggðri verönd með heitum pottum) í atvinnuskyni. Eftir að rammaáætlun var samþykkt 6. maí sl., var málið samstundis sett í áframhaldandi skipulagsbreytingu til að „aðlaga“ skipulagið að þegar reistum mannvirkjum. Þessi flýtimeðferð kemur í veg fyrir eðlilegt samráð og rannsókn á grenndaráhrifum. Ekki hefur verið gert áhrifamat fyrir stórtækar landslagsbreytingar, umhverfismat og hljóðvist, hvorki þegar þessu var breytt í íbúðarhverfi né nú þegar á að breyta þessu í verslunar- og þjónustusvæði, en ljóst er að þetta hefur enn meiri áhrif en gert var ráð fyrir og þetta veldur miklu meira ónæði en fjarlægðareglan var hönnuð til að þola. Sveitarfélagið hefur hunsað lögmæt erindi íbúa á meðan keyrt er í gegnum skipulagsbreytingar sem lögmæta eiga ólögmætar framkvæmdir og atvinnustarfsemi í íbúðabyggð. Við erum ennþá alfarið á móti þessu og þetta hefur óneitanlega mikil neikvæð áhrif á friðhelgi íbúa í kring. Skipulagsábending Þetta er í 7. skipti að það er spurt eftir athugasemdum um gistiþjónustu í Brúnagerði. Fyrsta skiptið var í september 2024 þegar nágranni í Brúnahlíð fann út, af tilviljun, að í staðinn fyrir íbúahverfi voru byggð fullinnréttuð 8 manna orlofshús. Þá voru komin 8 hús. Á upplýsingafundinum og eftir hann var þessu mikið mótmælt af okkur og öllum íbúum í kring. Við og fleiri höfum komið með athugasemdir á móti því að hafa gistiþjónustu á þessu svæði. Það er allt annað að hafa 40-50 manna nágrannabyggð en 104 manna gistiþjónustu (og það er enn glatað að segja að þetta hafi engin áhrif). Í 2021 þegar sótt var um að byggja íbúahverfi skrifuðum við sem athugasemd, af beinni eigin reynslu, að ekki er hægt að treysta þessum aðilum sem ætla að byggja þetta hverfi. Sem reynist rétt. Rök núna fyrir skipulagsbreytingu er að “þetta er að mestu leyti komið?. En það er eins og er bara komin upp 8 hús af 13. Í september 2024 þegar í ljós var komið að það var mikill mótstaða var ekki einu sinni komið byggingarleyfi fyrir áfanga B (síðustu 5 hús af 13). Við endurtökum í 7. skipti okkar athugasemdir en skiljum að ekki allir nenni að gera það þegar ekkert er gert með marktækar athugasemdir. Þann 6. nóvember 2024 skrifaði sveitarstjóri í bréfi til íbúa að hætt hafi verið við áætlanir um að hafa gistiþjónustu: “?..Í tengslum við erindið hefur Heiðin ehf. sent sveitarstjórn bréf þess efnis að félagið hafi fallið frá áformum þess um gistirekstur í öllum húsum götunnar eins og áður stóð til. Telja forsvarsmenn félagsins í ljósi fyrri afgreiðslu sveitarstjórnar að félagið geti í öllu falli ekki farið í skammtímaleigurekstur eins og lagt hafi verið upp með í upphafi. “ Núna nokkrum mánuðum seinna ætla þau að allt í einu að allt hverfið verði undir verslunar- og þjónustusvæði fyrir gistiþjónustu. Að fólk gefist upp á þessu (eftir að hafa þurft að koma endalaust með sömu athugasemdir) þýðir ekki að allir eru sammála þessu. Fólk er orðið mjög þreytt og það er nú þegar komið tal í hverfinu um að flytja bara í burtu. Það er ekki gott fyrir heilsuna að þurfa að standa í þessu í heilt ár. Við sendum aftur sömu athugasemdir í 6. sinn því ekkert hefur breyst frá fyrsta upplýsingafundi í september 2024 um þetta mál. Nema það hefur bara verið byggt áfram í þessu orlofsþorpi þó ábendingar gegn því væru komnar. Það er skrifað í tillögu til breytinga af skipulagi að það þarf að fjölga gististöðum í sveitarfélaginu. En það er þegar fjöldi gististaða í rekstri. Ferðaþjónustan á Leifsstöðum er að stækka, Lambinn, Iceland Yurt og það verður byggt stórt og glæsilegt nýtt hótel hjá Skógarböðunum. Í næsta nágrenni eru Hafdals hotel, Hotel Natur, Hotel Akureyri og hótelið í Sveinbjarnagerði sem hafa stækkað og svo kemur Hilton hotel. Það eru nú þegar margir flottir gististaðir í kring og í uppbyggingu af aðilum sem sóttu um tilskilin leyfi áður en byggt var. Við skiljum ekki af hverju það þarf að fórna íbúahverfi í meiri gistingu í þessu samhengi. Svo er líka spurning um að það verði allt of mikið álag á svæðinu ef það verður bætt við 104 manna gistingu við þegar starfrækta gistiþjónustu á svæðinu, m.a. í landi Leifsstaða og nú þegar skipulögð stækkun og áform um enn frekari stækkun á Hotel North með tilheyrandi álagi á umferð og veitukerfi. Framtíðar áform Hotel North er um 400 manna gisting og því ekki ráðlegt/hægt að bæta við 104 manna gistingu á sama svæði. Stefna aðalskipulagsins 2018-2030 fyrir Vaðlaheiði er hágæða og búsetuvæn íbúabyggð með dreifbýlisyfirbragði . Brúnagerði er byggt undir leyfi íbúðarhúsa, þá á ekki að vera neitt vandamál að nota þetta sem íbúðarhús. Að segja að “þetta er að mestu leyti komið? hefur þá ekkert að segja í þessu máli. Líka með það í huga að áfangi B er byggður eftir að vitað var af athugasemdum íbúa á svæðinu og höfnun sveitarstjórnar á að hafa gistiþjónustu. Þetta er eiginlega mjög einfalt mál: þetta hverfi var og er byggt undir skipulagi og leyfi sem íbúahverfi og einbýlishús samkvæmt áætlun fyrirtækisins gert af Kollgátu. Að fyrirtækið kjósi svo að full innrétta þessi hús fyrir 8 manna gistiþjónustu áður en leyfi er komið fyrir skammtímagistingu er fullkomlega á þeirra eigin ábyrgð og á ekki að bitna á nágrönnum. Rökin að það “vantar gistipláss? í sveitinni (það eru byggð og verður stækkað víða af hótelum á og kringum Akureyri og það er ekki komið utanlandsflug nema nokkra mánuði af árinu) er varla grunnur til að breyta heilu íbúahverfi með 13 einbýlishúsum í verslunar-og þjónustusvæði með gistingu og að hundsa allar ábendingar sem voru þegar komnar fram á íbúafundi og af sveitastjórn í september 2024 þegar áætlanir fyrir gistiþjónustu voru komnar í ljós. Þetta var ákveðið á 639. fundi sveitastjórnar 19. september 2024 kl. 08:00 - 10:05: Að mati meirihluta sveitarstjórnar hefur umsækjandi lýst því afdráttarlaust að umsókn um rekstrarleyfi tveggja húsa nú sé þannig liður í uppbyggingu svæðisins fyrir atvinnustarfsemi í formi skammtímaleigu. Um leið felst í áformunum að nærfelld engin íbúðabyggð verði á svæðinu, þar sem einstaklingar og fjölskyldur muni hafa varanlega búsetu. Þessi áform fara gegn gildandi skipulagi. Sveitarstjórn hefur áður lagst gegn því að svæðið verði skipulagt sem frístundabyggð, en telja verður að jafna megi fyrirhugaðri starfsemi við það og hún sé að minnsta kosti ekki íbúðabyggð. Það er mat meirihlutar sveitarstjórnar að starfsemin sé ekki í samræmi við gildandi skipulag. Er því óhjákvæmilegt að leggjast gegn útgáfu ótímabundinna starfsleyfa fyrir skammtímaleigu í húsunum nr. 3 og 5 við götuna Brúnagerði. Meirihluti sveitarstjórnar leggst gegn því að veitt verði ótímabundið rekstrarleyfi fyrir hús nr. 3 og felur sveitastjóra að koma umsögn um það til Sýslumannsins á Norðurlandi eystra, með þeim rökum sem reifuð eru á fundinum. Þau fengu sem sagt ekki leyfi fyrir gistingu í 8 eða 2 húsum en settu samt í gang gistiþjónustu starfssemi sumarið 2024 og héldu áfram að byggja og vilja nú hafa starfssemi í öllum 13 húsum íbúðarhverfisins. Er þá lausnin bara að breyta aðalskipulagi til að koma til móts við fyrirtæki sem getur eða vill ekki fylgja reglugerðum? Þetta mun hafa varanleg áhrif á svæðið. Með því munu þau breyta þessu einstaka íbúðasvæði á besta stað í sveitinni í orlofshúsaþorp á kostnað íbúa sem hafa byggt sér framtíð hér, og stríðir gegn gildandi skipulagi og rammaáætlun fyrir Eyjafjörð. Það er að fara alveg aftan að kerfinu og á móti vilja íbúa og meirihluta sveitarstjórnar. Og gefur mjög slæmt fordæmisgildi og grefur undan gildi skipulags vægast sagt, og við getum alls ekki stutt þetta og trúum ekki að sveitastjórn og skipulagsnefnd geti það heldur.

Afgreiðsla skipulagssnefndar: Skilgreining svæðisins í verslunar- og þjónustusvæði hefur ekki teljanleg aukin áhrif á grenndarhagsmuni á borð við umferð, myrkurgæði og vatns- og fráveitumál umfram íbúðarbyggð. Að lækur hafi yfirfyllst af jarðvegi og ræsi stíflast við Leifsstaðabrúnir vegna ófullnægjandi frágangs jarðvegs hefur ekki orsakast af þeim sökum að svæðið er í endurskilgreiningu sem verslunar- og þjónustusvæði heldur vegna mistaka verktaka sem sinna framkvæmdum.

Tekið er undir mikilvægi þess að lágmarka grenndaráhrif. Kröfur um veitur (vatn og fráveitu) og útfærslu hreinsivirkja verða unnar í samráði við Norðurorku og Heilbrigðiseftirlit og teknar fyrir í deiliskipulagi og við útgáfu leyfa. Varðandi frágang jarðvegs, yfirborðsvatn og varnir gegn rofi/aurburði verður gerð krafa um fullnægjandi frágang og viðeigandi eftirlit í tengslum við framkvæmdaleyfi og hönnun.

Breytist forsendur og áform um gistirekstur standast ekki væntingar er ekkert sem stendur í vegi fyrir því að hafin verði vinna við breytingu á skipulagi og svæðinu breytt í íbúðarbyggð.

Framkvæmdin fellur utan ákvæða í lögum 111/2021 um umhverfismat framkvæmda og áætlana. Við gerð skipulags er þó lagt mat á þá umhverfisþætti sem verða fyrir áhrifum og hvort tilefni sé til að bregðast við. Við breytingu á skipulagi svæðisins má búast við annarsskonar nýtingu en ekki umfangsmikilli aukinni umferð eða öðru ónæði, umfram það ef húsin væru íbúðarhús. Enda ósennilegt að öll húsin verði leigð út með hámarks afköstum allt árið um kring.

Athugasemd gefur ekki tilefni til breytinga á tillögunni.

4. erindi, sendandi Míla:

Umsögn: Míla gerir engar athugasemdir.

Afgreiðsla skipulagsnefndar: Athugasemd gefur ekki tilefni til breytinga á tillögunni.

5. erindi, sendandi Emilía Baldursdóttir:

Umsögn: Áskorun á sveitarstjórn og skipulagsnefnd

Það er sjálfsagt að taka vel á móti nýjum landeigendum í sveitinni okkar, ekki síst ef þeir ætla að setjast hér að. Það er líka sjálfsagt að gefa nýju fólki tækifæri til atvinnuuppbyggingar til jafns við þá sem fyrir eru en ekkert umfram það. Það er einnig sjálfsagt að gera þá kröfu að farið sé eftir þeim reglum og þeirri stefnumörkun sem samþykkt hefur verið í sveitarfélaginu og íbúar standa í góðri trú um að verði framfylgt. Ennfremur er það skýlaus krafa að ekki sé gengið á rétt þeirra sem fyrir eru og lífsgæði þeirra skert vegna framkvæmdagleði hinna.

Öll gerum við mistök en mestu skiptir að viðurkenna mistökin og reyna að bæta fyrir eins og kostur er. Ekki verður annað séð af gögnum en að skipulagsmistök ef ekki skipulagsslys hafi átt sér stað í norðurhluta Kaupangssveitar. Varðar það breytingar á aðal- og deiliskipulagi til að breyta íbúðasvæði í verslun og þjónustu og stefnir í enn verri mistök. Breytingarnar ganga gegn stefnumörkun og regluverki í bæði gildandi og komandi Aðalskipulagi og eru í verulegri óþökk íbúa á svæðinu.

Ég skora á komandi skipulagsnefnd og sveitarstjórn að endurskoða afstöðu til þessarra framkvæmda, beita því neitunarvaldi sem þessir aðilar hafa og finna niðurstöðu sem íbúar geta unað við.

Afgreiðsla skipulagsnefndar: Skipulagsvaldið er í höndum sveitarfélagsins sem leitar eftir umsögnum íbúa og hagsmunaaðila við skipulagsgerð hverju sinni og gerir breytingar á skipulagi gefi rök sterkt tilefni til þess.

Í aðalskipulagi eru stífir skilmálar er varða skiptingu lands, breytingu á landnotkun og heimild til uppbyggingar. Vaðlaheiði er eftirsóknarverður staður til uppbyggingar fyrir ýmsar sakir m.a. með hagkvæmni að leiðarljósi, stöðu innviða og staðsetningu. Með því að beina uppbyggingu þar sem byggð er fyrir og landi hefur verið raskað er tekið tillit til umhverfissins, ákvæða skipulagslaga- og reglugerða og tilmæla í landsskipulagsstefnu.

Skilgreining svæðisins í verslunar- og þjónustusvæði hefur ekki teljanleg aukin áhrif á grenndarhagsmuni á borð við umferð, myrkurgæði og vatns- og fráveitumál umfram íbúðarbyggð.

Athugasemd gefur ekki tilefni til breytinga á tillögunni.

6. erindi, sendandi Sigríður Hrönn Sigurðardóttir:

Umsögn: Ég tek undir áskorun Emilíu Baldursdóttur á sveitarstjórn og skipulagsnefnd Eyjafjarðar: Ég skora á skipulagsnefnd og sveitarstjórn að endurskoða afstöðu til þessara framkvæmda, beita því neitunarvaldi sem þessir aðilar hafa og finna niðurstðu sem íbúar geta unað við.

7. erindi, sendandi Rarik:

Umsögn: Rarik gerir ekki athugasemdir við tillöguna.

Afgreiðsla skipulagsnefndar: Athugasemd gefur ekki tilefni til breytinga á tillögunni.

8. erindi, sendandi Landsnet:

Umsögn: Landsnet telur ekki tilefni til efnislegrar umsagnar.

Afgreiðsla skipulagsnefndar: Athugasemd gefur ekki tilefni til breytinga á tillögunni.

9. erindi, sendandi Náttúrufræðistofnun:

Umsögn: Náttúrufræðistofnun gerir ekki athugasemdir við breytingarnar.

Afgreiðsla skipulagsnefndar: Athugasemd gefur ekki tilefni til breytinga á tillögunni.

10. erindi, sendandi Heilbrigðiseftirlit Norðurlands eystra:

Umsögn: Heilbrigðiseftirlit Norðurlands eystra gerir ekki athugasemdir við tillöguna.

Afgreiðsla skipulagsnefndar: Athugasemd gefur ekki tilefni til breytinga á tillögunni

11. erindi, sendandi Norðurorka:

Umsögn: Norðurorka gerir engar athugasemdir.

Afgreiðsla skipulagsnefndar: Athugasemd gefur ekki tilefni til breytinga á tillögunni.

12. erindi, sendandi Vegagerðin:

Umsögn: Vegagerðin hefur yfirfarið ofangreint efni með hliðsjón af hlutverki stofnunarinnar. Vegagerðin gerir ekki athugasemdir við skipulagslýsingu.

Afgreiðsla skipulagsnefndar: Athugasemd gefur ekki tilefni til breytinga á tillögunni.

13. erindi, sendandi Helga Hólmfríður Gunnlaugsdóttir:

Umsögn: Undirrituð flutti úr Brúnahlíð til Akureyrar í 18 mánuði og því fóru þessar breytingar fram hjá okkur hjónum að mestu. Enda ekki daglegt verk að fara inn á skipulagsgátt.

Ég á erfitt með að skilja hvernig það fór fram hjá skipulagsnefnd, sveitarstjórn og eftirlitsaðilum að byggð hafi verið frístundarhús á skipulögðu íbúðarsvæði.

Landeigendum tókst það nú samt og nú á að breyta svæðinu í verslunar og þjónustusvæði í samræmi við byggingarnar.

Ég vona að yfirvöld sjái að sér og leiðrétti þau mistök sem þau hafa gert ef það er möguleiki eða gæti þess allavega að endurtaka ekki sambærileg mistök.

Það kom mér gríðarlega á óvart hversu mikið umferð hefur aukist í hverfinu á þessu eina og hálfa ári, með tilheyrandi ónæði. Ryki, hávaða og ekki síst hættu fyrir skólabörn sem bíða skólabílsins í vegakanti á óupplýstum vegi.

Ég óttast að fráveitumál verði til vandræða til viðbótar við það ónæði sem Þessi aukna umferð hefur nú þegar valdið.

Ég skora á sveitarstjórn og skipulagsnefnd að hafa í huga framvegis að ekki verði gengið á rétt þeirra íbúa sem þegar búa í sveitarfélaginu bæði varðandi lífsgæði og verðmæti. Uppbygging er af hinu góða en á aldrei að koma niður á þeim sem fyrir eru.

Helga Gunnlaugsdóttir

Brúnahlíð 2

Afgreiðsla skipulagsnefndar: Á svæðinu hefur verið gert ráð fyrir uppbyggingu íbúðarbyggðar til lengri tíma. Þau hús sem byggð hafa verið skv. deiliskipulagi á svæðinu uppfylla kröfur sem íbúðarhús og eru í samræmi við ákvæði deiliskipulags. Uppbyggingu fylgir aukin umferð, sérstaklega á framkvæmdartíma þegar jarðrask er í hámarki og umferð vinnuvéla um svæðið. Að loknum framkvæmdum verða áhrif af skilgreiningu svæðisins í verslunar- og þjónustusvæði ekki mun umfangsmeiri en ef um hefðbundna íbúðarbyggð væri að ræða.

Athugasemd gefur ekki tilefni til breytinga á tillögunni.

14. erindi, sendendur Benedikt Helgason og Sigríður Helgadóttir:

Umsögn: Áskorun til sveitarstjórnar og skipulagsnefndar Við undirrituð teljum mikilvægt að sveitarfélagið taki vel á móti nýjum landeigendum og styðji við atvinnuuppbyggingu í sveitarfélaginu. Slík uppbygging verður þó að fara fram á jafnræðisgrundvelli og innan þeirra reglna og þeirrar stefnumörkunar sem sveitarfélagið hefur sjálft samþykkt og íbúar hafa treyst að verði virt. Atvinnustarfsemi má ekki ganga á rétt þeirra sem fyrir eru né skerða lífsgæði íbúa með óhóflegum grenndaráhrifum. Af þeim gögnum sem liggja fyrir verður ekki annað séð en að alvarleg mistök hafi átt sér stað í skipulagsmálum í norðurhluta Kaupangssveitar. Þar hefur verið unnið að breytingum á aðal- og deiliskipulagi með það að markmiði að breyta íbúðarsvæði í verslunar- og þjónustusvæði, þrátt fyrir að slíkt fari gegn bæði gildandi skipulagi og þeirri stefnu sem mörkuð hefur verið í komandi Aðalskipulagi. Ljóst er að þessar breytingar eru jafnframt í verulegri andstöðu við vilja fjölmargra íbúa á svæðinu.

Grenndaráhrif og framkvæmdir

Við teljum nauðsynlegt að farið verði ítarlega yfir áhrif framkvæmdanna áður en frekari ákvarðanir verða teknar. Þar þarf meðal annars að rannsaka:

- hljóðvist

- umferðaráhrif

- áhrif á myrkurgæði

- vatnsbúskap

- fráveitumál

- og önnur grenndaráhrif.

Nú þegar hafa komið upp alvarleg vandamál vegna framkvæmda á svæðinu. Lækur hefur fyllst af jarðvegi og ræsi stíflast vegna ófullnægjandi frágangs við umfangsmikla mótun landslags. Sprengingar og breytingar á landi hafa leitt til þess að vatn hefur leitað nýja farvegi inn á eign í Leifsstaðabrúnum, meðal annars í kjallara og innkeyrslu. Þá hefur vatnsbúskapur raskast enn frekar við tengingu hverfisins og eru þau vandamál enn óleyst.

Samskipti við íbúa og stjórnsýsla

Þann 17. febrúar 2026 sendu íbúar sveitarstjórn opið bréf með fjölda undirskrifta þar sem þessum áhyggjum var komið á framfæri. Þrátt fyrir ítrekanir í apríl hefur sveitarfélagið hvorki svarað erindinu né útskýrt tafir á afgreiðslu þess. Að okkar mati samræmist slíkt ekki þeim skyldum sem stjórnsýslulög nr. 37/1993 leggja á stjórnvöld, meðal annars samkvæmt 9. grein laganna. Við teljum einnig mjög alvarlegt að íbúar í Brúnahlíð hafi orðið fyrir þrýstingi af hálfu framkvæmdaraðila, Heiðin fasteignir ehf. Íbúum hefur meðal annars verið sent hótunarbréf um mögulegar skaðabótakröfur og jafnframt boðin malbikun á hverfið gegn því að þeir falli frá andmælum sínum við breytingar á landnotkun. Að okkar mati er óásættanlegt að skipulagsákvarðanir sveitarfélags byggist á samþykki sem fengið er með þrýstingi eða með loforðum um opinbera innviði.

Skortur á samráði

Samráð við þá íbúa sem verða fyrir mestum áhrifum hefur verið verulega ábótavant. Sérstaklega á þetta við um íbúa í Leifsstaðabrúnum sem búa beint neðan við svæðið og þar sem húsin snúa að fyrirhugaðri uppbyggingu. Framkvæmdirnar sjálfar vekja einnig upp spurningar um tilgang og umfang byggðarinnar. Húsin voru kynnt sem einbýlishús en eru í reynd hönnuð sem stórar gistieiningar til atvinnurekstrar, meðal annars fyrir allt að átta manns með yfirbyggðum veröndum og heitum pottum. Eftir samþykkt rammaáætlunar þann 6. maí sl. var þegar hafin vinna við frekari skipulagsbreytingar í því skyni að aðlaga skipulagið að þeim mannvirkjum sem þegar höfðu verið reist. Slík hraðmeðferð dregur úr möguleikum á eðlilegu samráði og faglegri rannsókn á grenndaráhrifum.

Áhrifamat og umhverfi

Þá liggur fyrir að hvorki hefur farið fram fullnægjandi áhrifamat vegna umfangsmikilla landslagsbreytinga né umhverfis- og hljóðvistarannsóknir, hvorki þegar svæðinu var upphaflega breytt í íbúðabyggð né nú þegar fyrirhugað er að breyta því í verslunar- og þjónustusvæði. Ljóst er að áhrif framkvæmdanna eru þegar orðin meiri en gert var ráð fyrir og ónæði gagnvart nágrönnum umfram það sem eðlilegt getur talist í íbúðahverfi. Við teljum að sveitarfélagið hafi brugðist skyldum sínum gagnvart íbúum með því að láta hjá líða að svara lögmætum erindum þeirra á sama tíma og unnið er að skipulagsbreytingum sem virðast ætlaðar til að lögfesta framkvæmdir og atvinnustarfsemi sem þegar hafa verið settar af stað í íbúðabyggð.

Áhrif á íbúðargæði

Við ítrekum eindregna andstöðu okkar við þessar áætlanir og teljum þær hafa verulega neikvæð áhrif á friðhelgi, umhverfi og lífsgæði íbúa á svæðinu. Eitt þessara húsa gnæfir yfir húsinu okkar, eins og sjá má á meðfylgjandi mynd. Myndin er tekin úr anddyri eignar okkar. Ljóst er að fyrirhugaðar breytingar bæði að Leifsstöðum II og Brúnagerði munu hafa veruleg áhrif á sumarhúsabyggðina sem eign okkar tilheyrir. Af þeim sökum teljum við mikilvægt að þessi mál verði metin og afgreidd samhliða þannig að heildaráhrif þeirra á svæðið liggi fyrir. Áskorun Við skorum því á komandi skipulagsnefnd og sveitarstjórn að endurskoða afstöðu sína til framkvæmdanna, nýta það vald sem þeim er falið samkvæmt skipulagslögum og leita lausnar sem íbúar svæðisins geta sætt sig við.

Afgreiðsla skipulagsnefndar: Tekið er undir mikilvæg þess að gætt sé að grenndaráhrifum og þau lágmörkuð eins og kostur er. Settir eru skilmálar um aðkomu/umferð, lýsingu og frágang. Veitumál eru útfærð í samráði við Norðurorku og Heilbrigðiseftirlit.

Skipulagsákvarðanir sveitarfélags byggja á lögbundinni málsmeðferð, jafnræði og faglegum forsendum.

Að lækur hafi yfirfyllst af jarðvegi og ræsi stíflast við Leifsstaðabrúnir vegna ófullnægjandi frágangs jarðvegs hefur ekki orsakast af þeim sökum að svæðið er í endurskilgreiningu sem verslunar- og þjónustusvæði heldur vegna mistaka verktaka sem sinna framkvæmdum.

Athugasemd gefur ekki tilefni til breytinga á tillögunni.

15. erindi, sendandi Erwin Cornelis Johannes van der Werve:

Umsögn: Síðustu fjögur ár er búið að vera mjög mikið ónæði af framkvæmdum í Brúnagerði. Ekki bara venjulegt byggingarhljóð, sem hefur líka verið mikið; jarðvegisvinna hefur verið stórtæk og hamrað á klöppunum í fleiri mánuði í nokkur ár. Heldur líka breyting á vatnsflæði með þeim afleiðingum að kjallari í húsi okkar í Leifsstaðabrúnum 14 hefur verið undir vatni. Innkeyrsla skemmd og vegurinn illa farinn. Hitaveitukerfið er í rugli og rusl hefur dreifst (fokið) út um alla sveitina og Leifsstaðavegurinn fyrir neðan Brúnagerði skemmdur eftir beltisgröfu og stóra vinnubíla. Núna þar sem þessum framkvæmdum er loksins að ljúka ætlar fyrirtækið (eða fleiri fyrirtæki sem standa fyrir þessu) ekki að hætta ónæði, heldur bæta í og mála svart ofan á grátt með að breyta íbúðarhverfi sem þau byggðu í orlofsþorp fyrir 104 manns. Það er búið að koma mikil mótmæli frá íbúum í kring (og frá sveitarstjórn) á móti þessu frá því um vorið 2024.

Þetta fer ekki eingöngu beinlínis á móti nýlega (6.maí 2026) samþykktri rammaáætlun fyrir þessi hverfi (sem var gert í samráði við alla íbúa og landeigendur í Vaðlaheiði og Kaupangsveit s.l. 3 ár), það hefur ekki heldur verið gefið íbúum alvöru tækifæri til þess að kynna sér málið á eðlilegan hátt;

Þetta var í 2022 kynnt sem íbúahverfi þar sem fólk átti að hafa fasta búsetu. Svo er bara byggt áfram og sett pressa á fólk með að segja ´að þetta sé núna komið´. Sem er ekki rétt: þetta eru íbúðarhús og hægt væri að nota þau sem slík.

Fjarlægðarreglum á milli þessa hverfis og annarra landeigenda er ekki fylgt fyrir orlofsþorp. Það er ekki það sama að hafa 4-5 manna fjölskyldu með fasta búsetu sem maður þekkir eða 8 manna hóp sem er í fríi, sinnum 13!

Stefna aðalskipulagsins 2018-2030 fyrir Vaðlaheiði er hágæða og búsetuvæn íbúabyggð með dreifbýlisyfirbragði. Að breyta þessu hverfi frá íbúðarhverfi í verslunar-og þjónustusvæði fer ekki bara á móti þessari stefnu. Það er líka beinlínis á móti sameiginlegri rammaáætlun Eyjafjarðarsveitar og Svalbarðsstrandahreppar frá maí 2026 (sem er partur af aðalskipulagi sem gildir fyrir þessi svæði).

Og engin rök hafa borist sem renna styrkum stoðum undir það af hverju ætti að veita undanþágu frá skipulagsskilmálum.

Það lítur allt út fyrir að skipulagskerfið sé hérna misnotað með fyrirfram brotavilja og farið aftan að kerfinu, fullu vitandi að það myndi aldrei hafa fengist leyfi til að byggja orlofsþorp á þessu svæði með að fara rétta leið. Sem er mjög slæmt fordæmi ef þetta verður leyft.

Afgreiðsla skipulagsnefndar: Ónæði af völdum framkvæmda stafar ekki af skilgreiningu svæðisins sem verslunar- og þjónustusvæði umfram það ef húsin yrðu nýtt sem íbúðarhúsnæði.

Að lækur hafi yfirfyllst af jarðvegi og ræsi stíflast við Leifsstaðabrúnir stafar af ófullnægjandi frágangi þeirra sem sinna framkvæmdum.

Áform um skilgreiningu verslunar- og þjónustusvæði að Brúnagerði stangast ekki á við ný samþykktan rammahluta aðalskipulags fyrir Vaðlaheiði, þar er einungis fjallað um íbúðar- og frístundabyggðir.

Skipulagsvaldið er í höndum sveitarfélagsins sem leitar eftir umsögnum íbúa og hagsmunaaðila við skipulagsgerð hverju sinni og gerir breytingar á skipulagi gefi rök sterkt tilefni til þess. Skilgreining svæðisins í verslunar- og þjónustusvæði er ekki um fordæmisgefandi, rammi aðalskipulags um landnotkun og kvaðir í skipulagslögum er mjög skýr og takmarkandi fyrir frekari uppbyggingu.

Athugasemd gefur ekki tilefni til breytinga á tillögunni.

16. erindi, sendandi Bergsteinn Gíslason:

Umsögn: Þetta mál hefur verið reyfað mjög vel hér af nokkrum íbúum.

Það er með ólíkindum hvað stjórnvaldið hefur látið snúa á sig hvað eftir annað.

Ég skora á sveitastjórn Eyjafjarðarsveitar að hafna þessum tilraunum eigenda Brúarlands til svo róttækra breytinga sem þeir hyggja á.

Það er skítalykt af þessu máli og nú er nóg komið.

Athugasemd gefur ekki tilefni til breytinga á tillögunni.

Deiliskipulagsbreyting:

1. erindi, Minjastofnun Íslands:

Afgreiðsla skipulagsnefndar: Athugasemd gefur ekki tilefni til breytinga á tillögunni.

2. erindi, sendandi Þóra Sólveig Bergsteinsdóttir:

Afgreiðsla skipulagsnefndar: Í aðalskipulagi eru stífir skilmálar er varða skiptingu lands, breytingu á landnotkun og heimild til uppbyggingar. Vaðlaheiði er eftirsóknarverður staður til uppbyggingar fyrir ýmsar sakir m.a. með hagkvæmni að leiðarljósi, stöðu innviða og staðsetningu. Með því að beina uppbyggingu þar sem byggð er fyrir og landi hefur verið raskað er tekið tillit til umhverfissins, ákvæða skipulagslaga- og reglugerða og tilmæla í landsskipulagsstefnu.

Framkvæmdin er ekki fordæmisgefandi og ekki verður heimiluð frekari uppbygging á reitnum nema sveitarstjórn telji þörf á frekari uppbyggingu á svæðinu.

Áhyggjur af grenndaráhrifum eru teknar til hliðsjónar við útgáfu framkvæmda- og byggingarleyfa og við framtíðarþróun svæðisins.

Athugasemd gefur ekki tilefni til breytinga á tillögunni.

3. erindi, sendandi Þóra Sólveig Bergsteinsdóttir:

Umsögn: Við sendum aftur sömu athugasemdir í 7. sinn því ekkert hefur breyst frá fyrsta upplýsingafundi í september 2024 um þetta mál. Nema það hefur bara verið byggt áfram í þessu orlofsþorpi þó ábendingar gegn því væru komnar. Við erum með athugasemdir varðandi framgangsmáta og varðandi ónæði sem fylgir 104 manna orlofsþorpi með yfirbyggðum veröndum og áherslu á útisetu fyrir 8 manns í hverju húsi. Að fólk gefist upp á þessu (eftir að hafa þurft að koma endalaust með sömu athugasemdir) þýðir alls ekki að allir eru sammála þessu. Fólk er orðið mjög þreytt og það er nú þegar komið tal í hverfinu um að flytja bara í burtu (og nokkrir hafa nú þegar flutt). Við bætum líka við opnu bréfi sent 17.febrúar 2026 til sveitarstjórnar frá meirihluta íbúa Leifsstaðabrúna sem er og verður fyrir mestum áhrifum ef þetta verður leyft. Það þarf að rannsaka hljóðvist og önnur grenndaráhrif eins og umferð, myrkurgæði og vatns- og fráveitumál. Lækur hefur yfirfyllst af jarðvegi og ræsi hafa stíflast við Leifsstaðabrúnir vegna ófullnægjandi frágangs jarðvegs við stórtæka endurmótun landslagsins. Landbúnaðarland var endurmótað í háa stalla og sprengingar á klöpp sem leiddi til þess að vatn leitar í nýjan farveg gegnum eign, kjallara og innkeyrslu í Leifsstaðabrúnum 14. Við tengingu hverfisins fór vatnsbúskapur einnig úr skorðum á eigninni og er enn vandamál. Þann 17. febrúar 2026 var sveitarstjórn sent opið bréf með fjölda undirskrifta íbúa. Þrátt fyrir ítrekanir í apríl hefur sveitarfélagið hvorki svarað bréfinu né rökstutt drátt á afgreiðslu, sem er brot á 9. gr. stjórnsýslulaga nr. 37/1993. Íbúar í Brúnahlíð hafa verið beittir þrýstingi af hálfu framkvæmdaraðila (Heiðin fasteignir ehf.) með hótunarbréfi um skaðabætur. Jafnframt hefur framkvæmdaraðili boðið íbúum malbikun á hverfið gegn því að þeir andmæli ekki breytingu á landnotkun. Við teljum það forkastanlegt að sveitarstjórn byggi skipulagsákvarðanir á samþykki sem fengið er með nauðung eða í skiptum fyrir opinbera innviði. Ekki var reynt að hafa samráð við íbúa í Leifsstaðabrúnum sem eru beint fyrir neðan (öll húsin vísa þangað) og verða fyrir mestum áhrifum af þessum áformum. Hús á svæðinu voru reist undir yfirskini einbýlishúsa en eru hönnuð sem stórtæk orlofshús, (8 manna gistieiningar með yfirbyggðri verönd með heitum pottum) í atvinnuskyni. Eftir að rammaáætlun var samþykkt 6. maí sl., var málið samstundis sett í áframhaldandi skipulagsbreytingu til að „aðlaga“ skipulagið að þegar reistum mannvirkjum. Þessi flýtimeðferð kemur í veg fyrir eðlilegt samráð og rannsókn á grenndaráhrifum. Ekki hefur verið gert áhrifamat fyrir stórtækar landslagsbreytingar, umhverfismat og hljóðvist, hvorki þegar þessu var breytt í íbúðarhverfi né nú þegar á að breyta þessu í verslunar- og þjónustusvæði, en ljóst er að þetta hefur enn meiri áhrif en gert var ráð fyrir og þetta veldur miklu meira ónæði en fjarlægðareglan var hönnuð til að þola. Sveitarfélagið hefur hunsað lögmæt erindi íbúa á meðan keyrt er í gegnum skipulagsbreytingar sem lögmæta eiga ólögmætar framkvæmdir og atvinnustarfsemi í íbúðabyggð. Við erum ennþá alfarið á móti þessu og þetta hefur óneitanlega mikil neikvæð áhrif á friðhelgi íbúa í kring. Skipulagsábending Þetta er í 7. skipti að það er spurt eftir athugasemdum um gistiþjónustu í Brúnagerði. Fyrsta skiptið var í september 2024 þegar nágranni í Brúnahlíð fann út, af tilviljun, að í staðinn fyrir íbúahverfi voru byggð fullinnréttuð 8 manna orlofshús. Þá voru komin 8 hús. Á upplýsingafundinum og eftir hann var þessu mikið mótmælt af okkur og öllum íbúum í kring. Við og fleiri höfum komið með athugasemdir á móti því að hafa gistiþjónustu á þessu svæði. Það er allt annað að hafa 40-50 manna nágrannabyggð en 104 manna gistiþjónustu (og það er enn glatað að segja að þetta hafi engin áhrif). Í 2021 þegar sótt var um að byggja íbúahverfi skrifuðum við sem athugasemd, af beinni eigin reynslu, að ekki er hægt að treysta þessum aðilum sem ætla að byggja þetta hverfi. Sem reynist rétt. Rök núna fyrir skipulagsbreytingu er að “þetta er að mestu leyti komið? En það er eins og er bara komin upp 8 hús af 13. Í september 2024 þegar í ljós var komið að það var mikill mótstaða var ekki einu sinni komið byggingarleyfi fyrir áfanga B (síðustu 5 hús af 13). Við endurtökum í 7. skipti okkar athugasemdir en skiljum að ekki allir nenni að gera það þegar ekkert er gert með marktækar athugasemdir. Þann 6. nóvember 2024 skrifaði sveitarstjóri í bréfi til íbúa að hætt hafi verið við áætlanir um að hafa gistiþjónustu: “?..Í tengslum við erindið hefur Heiðin ehf. sent sveitarstjórn bréf þess efnis að félagið hafi fallið frá áformum þess um gistirekstur í öllum húsum götunnar eins og áður stóð til. Telja forsvarsmenn félagsins í ljósi fyrri afgreiðslu sveitarstjórnar að félagið geti í öllu falli ekki farið í skammtímaleigurekstur eins og lagt hafi verið upp með í upphafi. “ Núna nokkrum mánuðum seinna ætla þau að allt í einu að allt hverfið verði undir verslunar- og þjónustusvæði fyrir gistiþjónustu. Að fólk gefist upp á þessu (eftir að hafa þurft að koma endalaust með sömu athugasemdir) þýðir ekki að allir eru sammála þessu. Fólk er orðið mjög þreytt og það er nú þegar komið tal í hverfinu um að flytja bara í burtu. Það er ekki gott fyrir heilsuna að þurfa að standa í þessu í heilt ár. Við sendum aftur sömu athugasemdir í 6. sinn því ekkert hefur breyst frá fyrsta upplýsingafundi í september 2024 um þetta mál. Nema það hefur bara verið byggt áfram í þessu orlofsþorpi þó ábendingar gegn því væru komnar. Það er skrifað í tillögu til breytinga af skipulagi að það þarf að fjölga gististöðum í sveitarfélaginu. En það er þegar fjöldi gististaða í rekstri. Ferðaþjónustan á Leifsstöðum er að stækka, Lambinn, Iceland Yurt og það verður byggt stórt og glæsilegt nýtt hótel hjá Skógarböðunum. Í næsta nágrenni eru Hafdals hotel, Hotel Natur, Hotel Akureyri og hótelið í Sveinbjarnagerði sem hafa stækkað og svo kemur Hilton hotel. Það eru nú þegar margir flottir gististaðir í kring og í uppbyggingu af aðilum sem sóttu um tilskilin leyfi áður en byggt var. Við skiljum ekki af hverju það þarf að fórna íbúahverfi í meiri gistingu í þessu samhengi. Svo er líka spurning um að það verði allt of mikið álag á svæðinu ef það verður bætt við 104 manna gistingu við þegar starfrækta gistiþjónustu á svæðinu, m.a. í landi Leifsstaða og nú þegar skipulögð stækkun og áform um enn frekari stækkun á Hotel North með tilheyrandi álagi á umferð og veitukerfi. Framtíðar áform Hotel North er um 400 manna gisting og því ekki ráðlegt/hægt að bæta við 104 manna gistingu á sama svæði. Stefna aðalskipulagsins 2018-2030 fyrir Vaðlaheiði er hágæða og búsetuvæn íbúabyggð með dreifbýlisyfirbragði . Brúnagerði er byggt undir leyfi íbúðarhúsa, þá á ekki að vera neitt vandamál að nota þetta sem íbúðarhús. Að segja að “þetta er að mestu leyti komið? hefur þá ekkert að segja í þessu máli. Líka með það í huga að áfangi B er byggður eftir að vitað var af athugasemdum íbúa á svæðinu og höfnun sveitarstjórnar á að hafa gistiþjónustu. Þetta er eiginlega mjög einfalt mál: þetta hverfi var og er byggt undir skipulagi og leyfi sem íbúahverfi og einbýlishús samkvæmt áætlun fyrirtækisins gert af Kollgátu. Að fyrirtækið kjósi svo að full innrétta þessi hús fyrir 8 manna gistiþjónustu áður en leyfi er komið fyrir skammtímagistingu er fullkomlega á þeirra eigin ábyrgð og á ekki að bitna á nágrönnum. Rökin að það “vantar gistipláss? í sveitinni (það eru byggð og verður stækkað víða af hótelum á og kringum Akureyri og það er ekki komið utanlandsflug nema nokkra mánuði af árinu) er varla grunnur til að breyta heilu íbúahverfi með 13 einbýlishúsum í verslunar-og þjónustusvæði með gistingu og að hundsa allar ábendingar sem voru þegar komnar fram á íbúafundi og af sveitastjórn í september 2024 þegar áætlanir fyrir gistiþjónustu voru komnar í ljós. Þetta var ákveðið á 639. fundi sveitastjórnar 19. september 2024 kl. 08:00 - 10:05: Að mati meirihluta sveitarstjórnar hefur umsækjandi lýst því afdráttarlaust að umsókn um rekstrarleyfi tveggja húsa nú sé þannig liður í uppbyggingu svæðisins fyrir atvinnustarfsemi í formi skammtímaleigu. Um leið felst í áformunum að nærfelld engin íbúðabyggð verði á svæðinu, þar sem einstaklingar og fjölskyldur muni hafa varanlega búsetu. Þessi áform fara gegn gildandi skipulagi. Sveitarstjórn hefur áður lagst gegn því að svæðið verði skipulagt sem frístundabyggð, en telja verður að jafna megi fyrirhugaðri starfsemi við það og hún sé að minnsta kosti ekki íbúðabyggð. Það er mat meirihlutar sveitarstjórnar að starfsemin sé ekki í samræmi við gildandi skipulag. Er því óhjákvæmilegt að leggjast gegn útgáfu ótímabundinna starfsleyfa fyrir skammtímaleigu í húsunum nr. 3 og 5 við götuna Brúnagerði. Meirihluti sveitarstjórnar leggst gegn því að veitt verði ótímabundið rekstrarleyfi fyrir hús nr. 3 og felur sveitastjóra að koma umsögn um það til Sýslumannsins á Norðurlandi eystra, með þeim rökum sem reifuð eru á fundinum. Þau fengu sem sagt ekki leyfi fyrir gistingu í 8 eða 2 húsum en settu samt í gang gistiþjónustu starfssemi sumarið 2024 og héldu áfram að byggja og vilja nú hafa starfssemi í öllum 13 húsum íbúðarhverfisins. Er þá lausnin bara að breyta aðalskipulagi til að koma til móts við fyrirtæki sem getur eða vill ekki fylgja reglugerðum? Þetta mun hafa varanleg áhrif á svæðið. Með því munu þau breyta þessu einstaka íbúðasvæði á besta stað í sveitinni í orlofshúsaþorp á kostnað íbúa sem hafa byggt sér framtíð hér, og stríðir gegn gildandi skipulagi og rammaáætlun fyrir Eyjafjörð. Það er að fara alveg aftan að kerfinu og á móti vilja íbúa og meirihluta sveitarstjórnar. Og gefur mjög slæmt fordæmisgildi og grefur undan gildi skipulags vægast sagt, og við getum alls ekki stutt þetta og trúum ekki að sveitastjórn og skipulagsnefnd geti það heldur.

Afgreiðsla skipulagsnefndar: Skilgreining svæðisins í verslunar- og þjónustusvæði hefur ekki teljanleg aukin áhrif á grenndarhagsmuni á borð við umferð, myrkurgæði og vatns- og fráveitumál umfram íbúðarbyggð. Að lækur hafi yfirfyllst af jarðvegi og ræsi stíflast við Leifsstaðabrúnir vegna ófullnægjandi frágangs jarðvegs hefur ekki orsakast af þeim sökum að svæðið er í endurskilgreiningu sem verslunar- og þjónustusvæði heldur vegna mistaka verktaka sem sinna framkvæmdum.

Athugasemd gefur ekki tilefni til breytinga á tillögunni.

4. erindi, sendandi Míla:

Umsögn: Míla gerir engar athugasemdir.

Afgreiðsla skipulagsnefndar: Athugasemd gefur ekki tilefni til breytinga á tillögunni.

5. erindi, sendandi Rarik:

Umsögn: Rarik gerir ekki athugasemdir við tillöguna.

Afgreiðsla skipulagsnefndar: Athugasemd gefur ekki tilefni til breytinga á tillögunni.

6. erindi, sendandi Landsnet:

Umsögn: Landsnet telur ekki tilefni til efnislegrar umsagnar.

Afgreiðsla skipulagsnefndar: Athugasemd gefur ekki tilefni til breytinga á tillögunni.

7. erindi, sendandi Náttúrufræðistofnun:

Umsögn: Náttúrufræðistofnun gerir ekki athugasemdir við deiliskipulagsbreytingarnar.

Afgreiðsla skipulagsnefndar: Athugasemd gefur ekki tilefni til breytinga á tillögunni.

8. erindi, sendandi Heilbrigðiseftirlit Norðurlands eystra:

Umsögn: Heilbrigðiseftirlit Norðurlands eystra gerir ekki athugasemdir við tillöguna og vísar til fyrri umsagnar um málið dags. 10. september 2025

Afgreiðsla skipulagsnefndar: Athugasemd gefur ekki tilefni til breytinga á tillögunni.

9. erindi, sendandi Norðurorka:

Umsögn: Norðurorka gerir engar athugasemdir.

Afgreiðsla skipulagsnefndar: Athugasemd gefur ekki tilefni til breytinga á tillögunni.

10. erindi, sendandi Vegagerðin:

Umsögn: Vegagerðin gerir ekki athugasemdir við breytingar á deiliskipulagi.

Afgreiðsla skipulagsnefndar: Athugasemd gefur ekki tilefni til breytinga á tillögunni.

11. erindi, sendendur Benedikt Helgason og Sigríður Helgadóttir:

Grenndaráhrif og framkvæmdir

Við teljum nauðsynlegt að farið verði ítarlega yfir áhrif framkvæmdanna áður en frekari ákvarðanir verða teknar. Þar þarf meðal annars að rannsaka:

- hljóðvist

- umferðaráhrif

- áhrif á myrkurgæði

- vatnsbúskap

- fráveitumál

- og önnur grenndaráhrif.

Samskipti við íbúa og stjórnsýsla

Skortur á samráði

Áhrifamat og umhverfi

Áhrif á íbúðargæði

Skipulagsákvarðanir sveitarfélags byggja á lögbundinni málsmeðferð, jafnræði og faglegum forsendum.

Athugasemd gefur ekki tilefni til breytinga á tillögunni.

12. erindi, sendandi Sigríður Hrönn Sigurðardóttir:

Umsögn: Ég tek undir athugasemdir sem gerðar eru í „ Opið bréf til sveitarstjórnar frá íbúum, land- og lóðaeigendum í landi Leifsstaða og Brúarlands vegna skipulagsmála í Brúnagerði“.

Eftir lestur bréfsins skil ég vel að íbúarnir vantreysta sveitarstjórn og skipulagsnefnd, sporin hræða.

Ég vona að ný sveitarstjórn og skipulagsnefnd beri gæfu til að standa við settar reglur og forðast að setja slæm fordæmi sem hægt er að benda á og grafa undan öllu gildi skipulags og reglugerða.

Að sýnd sé ábyrgð, fagmennska og gætt sé meðalhófs.

Afgreiðsla skipulagsnefndar: Tekið er undir mikilvægi faglegra vinnubragða, meðalhófs og samræmis við samþykkta stefnu eru hafðar til hliðsjónar.

Athugasemd gefur ekki tilefni til breytinga á tillögunni.

13. erindi, sendandi Erwin Cornelis Johannes van der Werve:

Og engin rök hafa borist sem renna styrkum stoðum undir það af hverju ætti að veita undanþágu frá skipulagsskilmálum.

Afgreiðsla skipulagsnefndar: Ónæði af völdum framkvæmda stafar ekki af skilgreiningu svæðisins sem verslunar- og þjónustusvæði umfram það ef húsin yrðu nýtt sem íbúðarhúsnæði.

Að lækur hafi yfirfyllst af jarðvegi og ræsi stíflast við Leifsstaðabrúnir stafar af ófullnægjandi frágangi þeirra sem sinna framkvæmdum.

Athugasemd gefur ekki tilefni til breytinga á tillögunni.

Ekki eru lagðar til breytingar á auglýstum aðal- og deiliskipulagstillögum í umfjöllun skipulagsnefndar á innkomnum umsögnum. Skipulagsnefnd leggur til við sveitarstjórn að auglýstar aðal- og deiliskipulagstillögur verði samþykktar skv. 32. gr., 41. gr. og 42. gr. skipulagslaga nr. 123/2010 og er skipulagsfulltrúa falið að fullnusta gildistöku skipulagsins.

3. Hótel við skógarböðin - DSK breyting vegna hreinsistöðvar - E2509010

Fyrir fundinum liggja athugasemdir sem bárust við grenndarkynningu breytingar á deiliskipulagi Ytri-Varðgjár, baðstaðar og hótels vegna staðsetningar hreinsistöðvar. Grenndarkynning fór fram frá 29. janúar til 27. febrúar 2026. Málið var síðast tekið fyrir á fundi sveitarstjórnar 30. apríl 2026, þar sem tillagan var samþykkt. Eftir stóð að taka afstöðu til framkominna athugasemda, sbr. 5.9.4. gr. skipulagsreglugerðar nr. 90/2013.

Umsagnaraðili: Emilía Baldursdóttir Óshólmanefnd

Umsögn:

Á fundi Óshólmanefndar 4. febrúar 2026 var samþykkt eftirfarandi bókun varðandi deiliskipulagsbreytingu vegna skólphreinsistöðvar við Skógarböð og hótel:

Ný staðsetning fyrirhugaðrar hreinsistöðvar fyrir Skógarböð og hótel er ekki á hverfisverndarsvæðinu en hún er engu að síður á náttúruverndarsvæði sem er mjög mikilvægt fuglum. Þarna er gert ráð fyrir 125 fermetra landfyllingu við lónið til viðbótar því sem orðið er. Framkvæmdin hlýtur óhjákvæmilega að valda röskun á botnseti lónsins og lífríki.

Óshólmanefndin hefur ekki fengið nein gögn með rökstuðningi fyrir því að þessi breyting sé nauðsynleg eða æskileg vegna náttúruverndar. Ekki heldur rökstuðning fyrir því að veita affalli frá hreinsistöðinni inn á hverfisverndarsvæðið vestan Eyjafjarðarbrautar, svæði sem heyrir undir náttúruverndarlög. Þarna koma leirur upp úr á fjöru og mikið er um fugla sbr. ítrekaðar fuglatalningar (Fuglar á Leirunni fyrir botni Eyjafjarðar 2004, Fuglalíf í óshólmum Eyjafjarðarár 2000, 2010 og 2020). Á flóði fara hins vegar allar leirur á kaf þannig að samfelld blanda árvatns og sjávar nær frá Eyjafjarðarbraut eystri að flugvallarsvæðinu. Mengun á einum stað á þessu svæði gæti því borist um allar leirurnar. Sjávarföllin valda því að affallið mun alltaf dreifast um leirurnar með aðfallstraumnum undir brúna ef affallsrörið endar sunnan Leiruvegarins.

Ekki hefur fengist svar við því hversu langt til vesturs rörið ætti að ná, þ.e. hvort það næði fram í árfarveginn sjálfan við Leirubrúna sem mundi auka líkur á að affallið rynni til sjávar. Þótt þriggja þrepa hreinsun eigi að skila tiltölulega hreinu affalli þá geta alltaf orðið óhöpp, bilanir eða önnur frávik og það kemur ekki fram hvaða trygging er gefin fyrir því að óhreinsað skolp renni ekki inn á leirurnar þegar hreinsun liggur niðri vegna rekstrarviðhalds eða bilana.

Óshólmanefndin mælir því gegn þessarri deiliskipulagsbreytingu og telur afar óæskilegt að byggð verði skólphreinsistöð á náttúruverndarsvæði og getur ekki samþykkt að affallinu þaðan yrði dælt yfir á einar dýrmætustu leirur landsins og jafnvel á heimsvísu.

Jóhann Reynir óskaði að bókað yrði að hann legðist ekki gegn færslu hreinsistöðvarinnar sjálfrar, en tekur undir með nefndinni að frárennslislögnin frá henni færi áfram norður fyrir Leiruveginn.

Viðbrögð Skipulagsnefndar:

Fyrirhuguð landfylling undir nýtt hreinsivirki fyrir Skógarböðin er vissulega landfylling til viðbótar við fyrri landfyllingar en markmiðið er að hún hafi lágmarks sjónræn áhrif, enda staðsett við aðkomu að hóteli Skógarbaðanna. Fyrirhugað rask á botnseti og lífríki er minniháttar og einungis á meðan á framkvæmdum stendur.

Uppbygging hótels á svæðinu krefst uppbyggingar hreinsivirkis og röksemdir fyrir því að staðsetja hreinsivirki við Eyjafjarðarbraut eystri er betra aðgengi til tæmingar úr hreinsivirkinu auk þess sem minni líkur eru á ofauðgun í Eyjafjarðará samanborið við lónið vegna örnæringarefna (e. micronutrients) sem kunna að fylgja siturlögn eftir hreinsun.

Þriggja þrepa hreinsun, er hreinsun skólps á viðkvæmum svæðum þar sem krafist er meira en tveggja þrepa hreinsunar, sbr. viðauka II í reglugerð um fráveitur og skólphreinsun nr. 1450/2025. Óshólmar Eyjafjarðarár, ásamt fjörum og flæðimýrum verða fyrir lágmarks neikvæðum áhrifum af framkvæmdinni þar sem um ítarlega hreinsun er að ræða og í samræmi við ítarlegustu kröfur reglugerðar um fráveitur og skólphreinsun.

Athugasemd gefur ekki tilefni til breytinga á tillögunni.

Umsagnaraðili: Heilbrigðiseftirlit Norðurlands eystra

Umsögn:

Heilbrigðiseftirlit Norðurlands eystra (HNE) gerir eftirfarandi athugasemdir við fyrirliggjandi tillögu og málsmeðferð:

Skortur á samráði: HNE gerir alvarlega athugasemd við að stofnuninni hafi ekki verið boðið að gefa umsögn um fyrirhugaða skipulagsbreytingu. Þetta er þvert á ákvæði í greinargerð gildandi skipulags þar sem skýrt er kveðið á um að samráð skuli haft við Heilbrigðiseftirlit Norðurlands eystra vegna útfærslu fráveitu.

Málsmeðferð: HNE telur að fyrirhuguð breyting á deiliskipulagi vegna hreinsistöðvar uppfylli ekki skilyrði þess að vera afgreidd sem „óveruleg“ skv. 44. gr. skipulagslaga nr. 123/2010. Embættið telur að meðhöndla beri málið sem hefðbundna deiliskipulagsbreytingu samkvæmt 43. gr. sömu laga af eftirfarandi ástæðum:

Breyttur viðtaki: Grundvallarmunur er á því að veita frárennsli í Eyjafjörð sem skilgreindur hefur verið sem síður viðkvæmur viðtaki og í árósa Eyjafjarðarár sem flokkast sem viðkvæmur viðtaki.

Staðsetning útrásar: Gert er ráð fyrir útrás frá skólphreinsistöð við Óshólma Eyjafjarðarár sem eru á náttúruminjaskrá vegna einstaks lífríkis.

Skortur á gögnum: Fyrir liggur að ekki hefur verið lögð fram umhverfisskýrsla þar sem áhrif á þetta viðkvæma svæði eru metin. HNE telur nauðsynlegt að lögð verði fram ný umhverfisskýrsla sem meti sértæk áhrif fráveitunnar á lífríkið.

Niðurstaða: Að mati HNE eru ekki forsendur til þess að taka afstöðu til breytinga á útfærslu fráveitumála á svæðinu þar sem fullnægjandi gögn liggja ekki til grundvallar. HNE leggur áherslu á að farið verði með málið sem formlega breytingu á deiliskipulagi og að tillagan, ásamt viðeigandi fylgigögnum, verði send umsagnaraðilum til afgreiðslu.

Viðbrögð Skipulagsnefndar:

Tekið er undir mikilvægi samráðs við heilbrigðiseftirlit í samræmi við ákvæði gildandi skipulags.

Vegna athugasemdar HNE var haldinn fundur með Leifi Þorkelssyni heilbrigðisfulltrúa HNE 21. apríl 2026.

Á þeim fundi samþykkti HNE breytingu á deiliskipulagi með eftirfarandi viðbótum við skilmála í greinargerð breytingarinnar:

Aðstaða skal vera fyrir sýnatöku á fráveituvatni fyrir og eftir meðhöndlun í hreinsivirki.

Afrennslið frá hreinsistöðinni verður leitt í röri frá hreinsistöðinni undir Eyjafjarðarbraut eystri og í ársóa Eyjafjarðará sem flokkast sem viðkvæmur viðtaki. Vegna þess skulu losunarmörk vera í samræmi við Viðauka II í reglugerð nr. 1450/2025 m.a. hvað varðar heildarstyrk fosfórs og köfnunarefnis.

Breyting á deiliskipulagi Eyjafjarðarsveit - Ytri Varðgjá, Baðstaður - deiliskipulag er í samræmi við ákvæði deiliskipulags um fráveitu sem segir Frágangur hreinsivirkis skal vera vandaður í alla staði þannig að engin mengun stafi af.

Fyrirhugað hreinsivirki er staðsett við Óshólma Eyjafjarðarár sem eru á C-hluta náttúruminjaskrár og því krafist þriggja þrepa hreinsunar skólps í samræmi við viðauka II í reglugerð um fráveitur og skólphreinsun nr. 1450/2025.

Ekki er um affall fráveitu að ræða og því er um lágmarks umhverfisáhrif að ræða.

Samráð við útfærslu verður haft þegar til framkvæmda kemur.

Athugasemd gefur ekki tilefni til breytinga á tillögunni.

Umsagnaraðili: Akureyrarbær

Umsögn:

Akureyrarbær tekur undir umsögn Heilbrigðiseftirlit Norðurlands eystra og leggur áherslu á að við hönnun verði allar kröfur uppfylltar sem gerðar eru til slíkra mannvirkja í lögum og reglugerðum.

Akureyrarbær vill vekja athygli á að mikilvægt er að Umhverfis- og orkustofnun (UOS) veiti umsögn um fyrirliggjandi deiliskipulagsbreytingu, enda býr stofnunin yfir þeirri fagþekkingu sem nauðsynleg er til að meta umhverfisáhrif framkvæmdar og viðtaka. Í tillögu að deiliskipulagsbreytingu eru ekki færð rök fyrir því að velja viðkvæman viðtaka frekar en síður viðkvæman eins og upphaflega var áætlað. Nauðsynlegt er að tekið verði fullt tillit til þeirrar umsagnar við endanlega afgreiðslu málsins.

Ef frárennsli á að leiða undir Eyjafjarðarbraut eystri og í Eyjafjarðará þarf að tryggja með skýrum hætti að frárennslið valdi ekki mengun eða neikvæðum áhrifum á nærliggjandi náttúrusvæði óshólma þó upp komi ófyrirséð atvik svo sem bilun í búnaði. Svæðið vestan Eyjafjarðarbrautar nýtur sérstakrar verndar sem þarf að horfa til þess þegar tekin er ákvörðun um hvert leiða á afrennsli frá hreinsistöð.

Viðbrögð Skipulagsnefndar:

Ekki er um affall fráveitu að ræða og því er um lágmarks umhverfisáhrif að ræða. Staðsetning hreinsivirkisins er fyrst og fremst valin með tilliti til aðgengis, hagkvæmni og afmörkunar landareignar.

Samráð við útfærslu verður haft við heilbrigðiseftirlit þegar til framkvæmda kemur.

Athugasemd gefur ekki tilefni til breytinga á tillögunni.

Umsagnaraðili: SUNN

Umsögn:

SUNN, Samtök um náttúruvernd á Norðurlandi tekur undir umsögn #1 frá Óshólmanefnd.

Svæðið vestan Eyjafjarðarbrautar eystri er hluti af verndarsvæðis óshólma Eyjafjarðarár, og leirurnar sunnan Leiruvegar milli Eyjafjarðarbrautar eystri og og flugvallarsvæðisins eru mjög mikilvægt farfuglasvæði með hátt verndargildi.

Ný staðsetning fyrirhugaðrar hreinsistöðvar fyrir Skógarböð og hótel er á þessu svæði, og við teljum ekki að um 'óverulega breytingu' á skipulagi sé að ræða. Engin rökstuðningur fylgir breytingartillögunni, og einnig er ekkert fjallað um hvernig brugðist verði við því ef bilanir eða rekstrarviðhald trufla virkni áætlaðrar hreinsistöðvar og ekki er skýrt frá því hvort eða hvernig verði notast við neyðarútrás í slíkum tilfellum. Leirurnar austan við veginn eru ekki á hinu skilgreinda svæði sem er mikilvægt fuglum, en vegna sjávarfalla er straumur sitt á hvað inn og út af leirunum og mengun á einum stað dreifist því um allar leirurnar.

kafli náttúruverndarlaga fjalla um sérstaka vernd tiltekinna vistkerfa og jarðminja, og flokkast leirur þar undir. Í 61. grein kaflans segir, að forðast eigi að raska á slíku svæði nema brýna nauðsyn beri til. Ennfremur segir í greininni að skylt sé að afla framkvæmdaleyfis, eða eftir atvikum byggingarleyfis, sbr. skipulagslög og lög um mannvirki, vegna framkvæmda sem hafa í för með sér slíka röskun. Áður en leyfi er veitt skal leyfisveitandi leita umsagnar Náttúruverndarstofnunar og viðkomandi náttúruverndarnefndar nema fyrir liggi staðfest aðalskipulag og samþykkt deiliskipulag. Því gerum við athugasemd við að ekki hafi verið óskað eftir umsögn frá Náttúruverndarstofnun varðandi breytinguna.

Einnig segir: Ákveði leyfisveitandi að heimila framkvæmd skal hann rökstyðja þá ákvörðun sérstaklega fari hún í bága við umsagnaraðila. Heimilt er að binda leyfi skilyrðum sem þykja nauðsynleg til að draga úr áhrifum framkvæmdarinnar á þau náttúrufyrirbæri sem verða fyrir röskun. Hér verðum við að benda aftur á, að enginn rökstuðningur liggur fyrir um ástæður breytinganna. Hvað varðar leiðir til að draga úr neikvæðum áhrifum, þá er ekki farið út í það hvað skyldi t.a.m. taka til bragðs ef bilun eða annað sem hindrar virkni hreinsistöðvarinnar.

Af ofangreindum ástæðum leggst SUNN gegn umræddri deiliskipulagsbreytingu.

Við setjum einnig spurningarmerki við það, hvers vegna Akureyrarbæ, sem er landeigandi á hálfum leirunum var ekki boðið með í grenndarkynningu.

Viðbrögð Skipulagsnefndar:

Sambærilegar hreinsistöðvar má finna bæði við Hrafnagilshverfi og Fosshótel Mývatn í Mývatnssveit. Við bilanir eru dælubílar sendir með óhreinsað skólp í næstu mögulegu hreinsistöð í samráði við heilbrigðiseftirlit.

Ekki stendur til að dæla óhreinsuðu affalli frá hreinsivirki, jafnvel þó bilun verði.

Fyrirhugað hreinsivirki beitir ítarlegustu tækni (e. BAT) við hreinsun sem um getur og því er ekki mögulegt að binda framkvæmdina stífari skilyrðum.

Athugasemd gefur ekki tilefni til breytinga á tillögunni.

Umsagnaraðili: Náttúrufræðistofnun

Umsögn:

Samkvæmt gildandi deiliskipulagi er gert ráð fyrir að fráveitufrá Skógarböðunum og fyrirhuguðu hóteli verði veitt í nýja hreinsistöð fráveitu norðan þjóðvegar nr. 1. Breytingartillagan sem nú er kynnt gerir ráð fyrir hreinsistöð með þriggja þrepa hreinsun sem myndi taka við fráveitu frá Skógarböðunum og fyrirhuguðu hóteli og yrði hún staðsett norðan aðkomuvegar að fyrirhuguðu hóteli. Afrennslið frá hreinsistöðinni yrði leitt í röri undir Eyjafjarðarbraut eystri og í Eyjafjarðará.

Náttúrufræðistofnun gerir eftirfarandi athugasemdir við skipulagsbreytinguna. Ekki liggur ljóst fyrir hvers vegna þörf er á að breyta gildandi deiliskipulagi, þ.e. af hverju horfið er frá því að veita fráveitu í nýja hreinsistöð norðan þjóðvegar nr. 1.

Óshólmar Eyjafjarðarár hafa verið skilgreindir sem Mikilvægt fuglasvæði. Þarna er að finna fjölbreytt búsvæði, s.s. leirur og flæðilönd, sem fóstra mikið fuglalíf. Alls hafa fundist 32 tegundir varpfugla innan svæðisins og þá hefur fjöldi jaðrakana á fartíma náð alþjóðlegum verndarviðmiðum.

Í ljósi mikilvægis svæðisins þarf að gæta fyllstu varúðar í umgengni við það og því ætti ekki að veita afrennsli frá Skógarböðunum í Eyjafjarðará.

Viðbrögð Skipulagsnefndar:

Röksemdir fyrir því að staðsetja hreinsivirki við Eyjafjarðarbraut eystri er betra aðgengi að hreinsivirkinu auk þess sem minni líkur eru á ofauðgun í Eyjafjarðará samanborið við lónið vegna örnæringarefna (e. micronutrients) sem kunna að fylgja siturlögn eftir hreinsun. Einnig er landeigandi bundinn af landeignamörkum og getur því ekki staðsett fyrirhugað hreinsivirki þar sem gert var ráð fyrir því í upphafi.

Skipulagsnefnd leggur til við sveitarstjórn að fyrirliggjandi svör við athugasemdum verði samþykkt og breytingartillagan á deiliskipulagi Ytri-Varðgjár, baðstaðar og hótels vegna staðsetningar hreinsistöðvar, verði samþykkt að nýju. Nefndin telur að framkomnar athugasemdir gefi ekki tilefni til frekari breytinga á tillögunni, enda hefur verið brugðist við þeim atriðum sem fram hafa komið við meðferð málsins.

4. Hringtorg við Hringveg og Eyjafjarðarbraut eystri - leyfi vegna rannsóknarfyllingar og -borana - E2608003

Vegagerðin sækir um leyfi fyrir jarðvegsrannsóknum vegna hönnunar hringtorgs við vegamót Hringvegar og Eyjafjarðarbrautar eystri. Sótt er um að setja niður rannsóknarfyllingu innan hönnunarsvæðis hringtorgs sem standa þarf a.m.k. 1 m yfir sjávaryfirborði við háflóð og er áætlað efnismagn í hana um 300 m3. Jafnframt er sótt um að bora í rannsóknarfyllinguna niður á fast undirlag, eða a.m.k. 15 metra niður og framkvæmda jarðsjármælingu. Óskað hefur verið eftir umsögn Náttúrufræðistofnunar um áformin.

Skipulagsnefnd leggur til við sveitarstjórn að leyfi verði veitt vegna fyrirhugaðra jarðvegsrannsókna við vegamót Hringvegar og Eyjafjarðarbrautar eystri, enda hafa borist jákvæð viðbrögð frá Náttúrufræðistofnun.

5. Hrafnabjörg L235978 - Ósk um DSK fyrir frístundarhúsum - E2509029

Fyrir fundinum liggur skipulagslýsing, unnin af Ívari Ragnarssyni, dags. 11.06.2026 vegna skipulagningar frístundasvæðis F6 í landi Höskuldsstaða og Jódísarstaða. Markmið deiliskipulagsins er m.a. að skipuleggja fimm frístundalóðir á svæðinu og yrði hver um sig um 10.000 til 21.500 fermetrar að stærð.

Skipulagsnefnd leggur til við sveitarstjórn að fyrirliggjandi skipulagslýsing verði samþykkt og kynnt í samræmi við 3. mgr. 40. gr. skipulagslaga nr. 123/2010.

6. Sveinsbær L208354 - beiðni um heimild til deiliskipulagsbreytingar - E2608015

Jólagarðurinn ehf. sækir óskar eftir heimild til deiliskipulagsbreytingar á deiliskipulagi Hrafnagilshverfis þannig að heimilt verði að staðsetja hús BSO á lóð Sveinsbæjar sbr. meðfylgjandi erindi og grunn- og afstöðumynd. Deiliskipulagsuppdráttur fyrir Hrafnagilshverfi fylgir fundargögnum.

Skipulagsnefnd frestar málinu og óskar eftir ítarlegri gögnum.

7. Klauf - tilkynning um framkvæmdir undanþegnar byggingarleyfi - E2608017

Fyrir fundinum liggur umsókn um stöðuleyfi fyrir 360 m² tjaldskemmu á jörðinni Klauf L152678. Samkvæmt umsókn er fyrirhuguð staðsetning um 80 m frá næstu landamerkjum.

Skipulagsnefnd leggur til við sveitarstjórn að erindið verði samþykkt og felur byggingarfulltrúa að gefa út stöðuleyfi til eins árs fyrir tjaldskemmunni í samræmi við fyrirliggjandi gögn.

8. Arnarhóll lóð - tilkynning um framkvæmdir undanþegnar byggingarleyfi - E2608013

Arnar Þór Hjaltason sækir um stöðuleyfi fyrir um 70 fermetra sumarhúsi á lóðinni Arnarhóli lóð L202907 á meðan framtíðarstaðsetning fyrir húsið er fundin sbr. meðfylgjandi umsókn og afstöðumynd.

Skipulagsnefnd frestar málinu. Skipulagsfulltrúa falið að ræða við málsaðila.

9. Skólatröð 13 L240619 - beiðni um staðsetningu smáhýsis við lóðamörk - E2608018

Jóhann Freyr Jónsson sækir um að fá að staðsetja 15 fermetra smáhýsi á lóðarmörkum Skólatraðar 13 sbr. meðfylgjandi tölvupóst og afstöðumynd.

Skipulagsnefnd leggur til við sveitarstjórn að erindið verði samþykkt.

10. Syðra-Laugaland - merkjalýsing vegna hnitsetningar skika - E2607001

Fyrir fundinum liggur merkjalýsing, dags. 15.06.2026, vegna skika innan jarðarinnar Syðra-Laugalands, L152790. Í merkjalýsingunni felst að afmarkaður og hnitsettur er 2.100 m² skiki innan jarðarinnar en innan skikans eru mhl 05 fjárhús, mhl 08 hlaða og mhl 13 kálfahús. Sótt er um að staðfang nýja landskikans verði Syðra-Laugaland 3.

Skipulagsnefnd leggur til við sveitarstjórn að ekki verði gerð athugasemd við framlagða merkjalýsingu og að hún verði samþykkt á grundvelli reglugerðar um merki fasteigna nr. 160/2024. Jafnframt leggur nefndin til að nýr landskiki fái staðfangið Syðra-Laugaland 3. Skipulagsnefnd felur skipulagsfulltrúa að ræða við landeiganda um aðkomu í tengslum við merkjalýsingu.

11. Þjóðlendan Laugafell L237821 - afmörkun lóðar undir skálabyggingar - E2606017

Lögð fyrir merkjalýsing þar sem verið er að stofna nýja 2,90 ha lóð, Laugafell (L241709) úr þjóðlendunni Laugafelli (L237821) en innan marka hinnar nýju lóðar eru 4 mannvirki/skálar Ferðafélags Akureyrar. Þessu samhliða breytist staðfang þjóðlendunnar Laugafells (L237821) í "Fjöllin austur" svo ekki séu tvær fasteignir innan sveitarfélagsins með sama staðfang. Jafnframt fylgir forathugun vegna skipulags og lóðarstofnunar við Laugafell en skv. 10 gr. laga nrþ. 100/2021 skal fara fram forathugun áður en tekin er ákvörðun um að auglýsa sérleyfis- eða rekstrarsamninga.

Skipulagsnefnd leggur til við sveitarstjórn að ekki verði gerð athugasemd við framlagða merkjalýsingu með fyrirvara um undirskrift Ríkissjóður Íslands og að hún verði samþykkt á grundvelli reglugerðar um merki fasteigna nr. 160/2024. Í framhaldinu verði send beiðni til ráðuneytisins um stofnun nýrrar lóðar.

12. Umsagnarbeiðni - Vaðlaborgir B - Íbúðarsvæði deiliskipulag - Kynning tillögu á vinnslustigi - E2606018

Erindi dagsett 9.06.2026 þar sem Svalbarðsstrandarhreppur óskar eftir umsögn er varðar Vaðlaborgir B - Íbúðarsvæði deiliskipulag, nr. 1123/2025: Kynning tillögu á vinnslustigi (Nýtt deiliskipulag)

Skipulagsnefnd leggur til við sveitarstjórn að ekki verði gerð athugasemd við fyrirliggjandi tillögu að deiliskipulagi Vaðlaborga B. Nefndin leggur þó til að horft verði til þess möguleika að tengja íbúasvæðin með göngustíg.

13. Samtök um dýravelferð á Íslandi - erindi um bann við loðdýrarækt í aðalskipulagi - E2608012

Lagt fram erindi frá Samtökum um dýravelferð á Íslandi þar sem íslensk sveitarfélög eru hvött til þess að banna loðdýrarækt innan sveitarfélags í Aðalskipulagi.

Lagt fram til kynningar.

Fleira ekki gert. Fundi slitið kl. 11:20

Skipulagsnefnd

Skjöl og útgefið efni