Björgum Kritnesspítala – stofnun félagasamtaka 1. nóvember

Þann 1. nóvember næstkomandi verða liðin 99 ár frá vígslu Kristneshælis í Eyjafirði. Eins og alþjóð veit er ástand hússins slæmt og búið að loka endurhæfingunni. Við erum ansi mörg sem viljum leggja okkar á vogarskálarnar svo gert verði við húsið og endurhæfingunni haldið áfram á þessum fallega og heilandi stað með skóginn fyrir ofan og sérstaka endurhæfingarsundlaug innanhúss. Endurhæfingin er mikilvæg fyrir allt Norður- og Austurland.

Liður í þeirri baráttu er að stofna félagasamtökin Björgum Kristnesspítala þann 1. nóvember kl. 17 á Hælinu setri um sögu berklanna. Athöfnin hefst fyrir utan með varðeldi og heitu kakói og svo fer stofnfundur fram með samþykktum félagsins og kosningu í stjórn. Markmið félagsins er að þrýsta á þar til bær yfirvöld að halda áfram með endurhæfingu á Kristnesi og byrja að safna fyrir endurbótum.

Allir velkomnir! Einstaklingar, fulltrúar félagasamtaka, stofnana og fyrirtækja. Saman getum við flutt fjöll!

Hælið setur um sögu berklanna.