Dagskrá:
Almenn erindi
1. E2205018 - Skipan í nefndir og ráð 2022 til 2026
Kjartan Sigurðsson hefur af persónulegum ástæðum óskað lausnar frá sveitarstjórnarstörfum en hann hefur setið sem aðalfulltrúi í sveitarstjórn, í framkvæmdaráði og sem formaður í atvinnu- og umhverfisnefnd.
Þá er tekin til umræðu breyting á samráðshóp vegna endurskoðunar aðalskipulags Eyjafjarðarsveitar þar sem fulltrúum er fjölgað úr þremur í fimm.
Sveitarstjórn þakkar Kjartani Sigurðssyni fyrir góð störf í þágu sveitarfélagsins undanfarin þrjú ár og óskar honum velfarnaðar.
Sveitarstjórn samþykkir samhljóða að Anna Guðmundsdóttir taki sæti sem aðalmaður í stað Kjartans. Þá kemur Rósa Margrét Húnadóttir inn sem fjórði varamaður F-lista.
Sveitarstjórn samþykkir samhljóða að skipa Sigurð Inga Friðleifsson sem nýjan formann atvinnu- og umhverfisnefndar. Þá tekur Karl Jónsson sæti aðalmanns F-lista í nefndinni og Hákon Bjarki Harðarson kemur inn sem fjórði varamaður F-lista.
Sveitarstjórn samþykkir samhljóða að stækka samráðshóp vegna aðalskipulagsvinnu úr þremur fulltrúum í fimm. Ásta Arnbjörg Pétursdóttir víkur úr hópnum vegna anna og Benjamín Örn Davíðsson kemur inn í stað hennar fyrir K lista, þá kemur Guðmundur Sigurbjörn Óskarsson inn sem nýr fulltrúi K lista og Anna Guðmundsdóttir sem nýr fulltrúi F lista. Í framkvæmdaráð kemur Berglind Kristinsdóttir sem nýr fulltrúi F lista.
2. E2506054 - Umsókn um framkvæmdaleyfi - Varðgjárlón hækkun vatnsyfirborðs
N10b sækir um framkvæmdaleyfi í tilgangi að koma fyrir þrepi í ræsi við Þjóðveg 1 úr lóni sem myndaðist þegar Eyjafjarðarbraut eystri var lögð. Vatnsstaða lónsins ræðst í dag af sjávarstöðu en sjórinn hefur borið inn með sér jarðefni (fíngerðan leir og drullu). Um er að ræða 15cm hækkun á vatnsyfirborði í lóninu á fjöru sem kallað hefur verið Varðgjárljón og fer því uppsafnað jarðefni á kaf eftir framkvæmdina sem hefur engin áhrif á vatnsyfirboð lónsins í flóði.
Skipulagsnefnd tók erindið fyrir á 434. fundi sínum þar sem nefndin frestaði erindinu og óskaði umsagnar Umhverfisstofnunar. Þá tók nefndin erindið aftur fyrir á 436. fundi sínum og lagði til við sveitarstjórn að framkvæmdaleyfi verði veitt fyrir framkvæmdinni.
Skipulagsnefnd leit svo á að hagsmunir af framkvæmdinni vegi þyngra en möguleg áhrif hennar. Feli framkvæmdin meðal annars í sér það markmið að vernda andarunga fyrir ágangi máva sem tína andarungana upp þegar vatnsstaða tjarnarinnar er lægri og þornar að hluta til upp á fjöru. Þá liggi ekki fyrir vísbendingar um að hækkun vatnsyfirborðsins hafi áhrif á nærsvæði tjarnarinnar sem ekki muni stækka að ummáli. Þá taldi skipulagsnefnd að umfang framkvæmdarinnar sé takmarkað og áhrifin afturkræf ef til framtíðar verður ákveðið að fjarlægja þröskuldinn.
Sveitarstjórn hefur kynnt sér umsögn Náttúruverndarstofnunar, dags 6. ágúst 2025, og tillögu skipulagsnefndar þar sem fram kemur að framkvæmdin feli ekki í sér verulega röskun lands eða gróðurs heldur fyrst og fremst hækkun vatnsyfirborðs tjarnarinnar um allt að 15 sentimetra. Fyrir liggur einnig að landeigandi hafði velt upp þeim möguleika að dýpka tjörnina með því að fjarlægja úr henni efni en í því felst umtalsvert meira rask meðan á framkvæmd stendur. Sveitarstjórn telur augljóst að þröskuldur til hækkunar vatnsyfirborðs sé einfaldari aðgerð til að viðhalda tjörninni.
Sveitarstjórn telur ekki tilefni til að hafna umbeðnu framkvæmdaleyfi þar sem tjörninni sé við haldið, hækkun yfirborðsins hafi ekki áhrif út fyrir svæði tjarnarinnar og ljóst sé að framkvæmdin sé auðveldlega afturkræf komi í ljós brýn nauðsyn til síðar.
Sveitarstjórn samþykkir umsókn N10b ehf. og felur skipulagsfulltrúa að gefa út framkvæmdaleyfi á forsendum hennar.
3. E2508002 - Umsagnarbeiðni v. Orlofshús og hótel á Leifsstöðum - Kynning matsáætlunar
Skipulagsstofnun hefur óskað eftir umsögn Eyjafjarðarsveitar við eftirfarandi mál í Skipulagsgátt: Orlofshús og hótel á Leifsstöðum, nr. 1033/2025: Kynning matsáætlunar (Mat á umhverfisáhrifum).
Skipulagsnefnd tók erindið fyrir á 436. fundi sínum og telur að greinagerðin sé fullnægjandi hvað varðar umhverfisáhrif og því ekki þörf á frekara umhverfismati framkvæmda en tekur fram að framkvæmdin sé háð framkvæmdaleyfi og byggingarleyfi hjá Eyjafjarðarsveit.
Sveitarstjórn telur skipulagsgreinagerðina fullnægjandi hvað varðar umhverfisáhrif og því ekki þörf á frekara umhverfismati framkvæmda.
4. E2507006 - Umhverfis- og orkustofnun - Umsókn um rannsóknarleyfi á vatnasviði Eyjafjarðarár
Arctic Hydro ehf. Sækir um leyfi til rannsókna á afmörkuðum hluta vatnasviðs Eyjafjarðarár innarlega í Eyjafjarðardal í Eyjafjarðarsveit í Eyjafirði, með tilliti til fýsileika og hagkvæmni rennslisvirkjunar í Eyjafjarðará.
Skipulagsnefnd tók erindið fyrir á 436. fundi sínum og lagði til við sveitarstjórn að ekki sé gerð athugasemd við að Arctic Hydro ehf. fái leyfi til rannsóknar á umræddu svæði.
Sveitarstjórn gerir ekki athugasemd við að Arctic Hydro ehf. fái leyfi til rannsóknar á umræddu svæði til allt að fimm ára í samræmi við umsóknina.
5. E2508008 - Vegagerðin - Tilkynning um fyrirhugaða niðurfellingu Akursvegar 2 nr. 8403-01 og Brúarlandsvegar nr. 8485-01 af vegaskrá
Fyrir fundinum liggur tilkynning frá vegagerðinni um fyrirhugaða niðurfellingu Akursvegar 2 nr. 8403-01 og Brúarlandsvegar nr. 8485-01 af vegaskrá. Skipulagsnefnd tók erindið til umfjöllunar á 436. fundi sínum og benti á að lögheimil sé að Akri og því ekki eðlilegt að taka veg nr. 8403-01 af Vegaskrá.
Lagt fram til kynningar. Sveitarstjórn brýnir nauðsyn þess að koma ábendingu skipulagsnefndar til Vegagerðarinnar og felur sveitarstjóra að fylgja því eftir.
6. E2508010 - Umsagnarbeiðni, Vaðlaborgir B - Íbúðarsvæði deiliskipulag - Lýsing
Svalbarðsstrandarhreppur hefur óskað eftir umsögn Eyjafjarðarsveitar við eftirfarandi mál í Skipulagsgátt: Svalbarðsstrandarhreppur, Vaðlaborgir B - Íbúðarsvæði deiliskipulag, nr. 1123/2025: Lýsing (Nýtt deiliskipulag)
Kynningartími er frá 13.8.2025 til 10.9.2025.
Skipulagsnefnd tók erindið fyrir á 436. fundi sínum og bendir á að mikilvægt sé að samskipti séu milli landeigenda og skipulagshönnuða varðandi mögulegar vegtengingar á milli skipulagssvæða til norðurs og suðurs bæði varðandi aksturs- og gönguleiðir utan Veigastaðavegar. Að öðru leiti leggur skipulagsnefnd til við sveitarstjórn að ekki verði gerð athugasemd við lýsingu á nýju deiliskipulagi íbúðarsvæðis í Vaðlaborgum B sem tekur mið af rammahluta aðalskipulags sveitarfélaganna um uppbyggingu byggðar í Vaðlaheiði.
Sveitarstjórn tekur undir ábendingu skipulagsnefndar um tengingu milli skipulagssvæða til norðurs og suðurs og felur sveitarstjóra að koma þeirri ábendingu til skila. Að öðru leyti gerir sveitarstjórn ekki athugasemd við deiliskipulagsslýsinguna.
7. E1706026 - Oddi (áður Espigerði), Birkitröð, Kvos - Breytingartillaga á deiliskipulagi
Tekin fyrir að nýju tillaga að breytingu á deiliskipulagi Odda (áður Espigerði), Birkitröð, Kvos. Tillagan var áður auglýst með athugasemdafresti frá 8. febrúar 2021 til 1. apríl 2021 en sökum þess að ár leið frá því að tillagan var auglýst áður en auglýsing um gildistöku var birt í B deild Stjórnartíðinda, þurfti að auglýsa tillöguna að nýju. Sveitarstjórn Eyjafjarðarsveitar samþykkti á þann 26. febrúar 2025 að auglýsa að nýju tillögu að deiliskipulagi íbúðarsvæðis í Leifsstaðabrúnum, Oddi (áður Espigerði), Birkitröð, Kvos. Skipulagsnefnd tók erindið fyrir á 436. fundi sínum þar sem hún fór yfir innkomnar athugasemdir sem bárust við endurauglýsingu tillögunnar. Skipulagsnefnd leggur til við sveitarstjórn að breytingar verði gerðar á tillögunni í samræmi við umræður á fundinum og að skipulagsfulltrúa verði falið að sjá um gildistöku tillögunnar í samræmi við 1. mgr. 42. gr. skipulagslaga nr. 123/2010.
Sveitarstjórn samþykkir samhljóða að breytingar verði gerðar á tillögunni í samræmi við ábendingar Vegagerðarinnar og fram koma í tillögu að afgreiðslu skipulagsnefndar í meðfylgjandi gögnum. Sveitarstjórn felur skipulagshönnuði að uppfæra tillöguna til samræmis við afgreiðslu skipulagsnefndar og leggja uppfærð drög aftur fyrir skipulagsnefnd til afgreiðslu.
8. E2501024 - Stefnumál sveitarstjórnar 2022-2026
Sveitarstjórn fer yfir stöðu stefnumála listanna fyrir kjörtímabilið 2022- 2026.
Sveitarstjórn fer yfir stöðu mála.
9. E2502037 - Fasteignir Eyjafjarðarsveitar
Sveitarstjórn fer yfir fasteignir sveitarfélagsins út frá áherslum fjárhagsáætlunar.
Sveitarstjórn leggur áherslu á að setja Skólatröð 13 og færanlegar viðbyggingar gamla leikskólans í söluferli.
Sveitarstjórn samþykkir samhljóða að gera breytingar á skipulagi og lóðarblaði vegna Skólatraðar 13.
Sveitarsjóra falið að setja ferlin af stað.
10. E2504033 - Fjárhagur sveitarfélagsins
Sveitarstjórn ræðir fjármögnunarkosti vegna framkvæmda og almenna stöðu fjárhags og framkvæmda.
Sveitarstjóri kynnir fjárhagsstöðu og fjármögnunarleiðir.
Fundargerðir til kynningar
11. 2508004F - Fjallskilanefnd Eyjafjarðarsveitar - 50
Fundargerð 50. fundar Fjallskilanefndar Eyjafjarðarsveitar lögð fram til kynningar.
Gefur ekki tilefni til ályktunar.
12. 2508007F - Skipulagsnefnd Eyjafjarðarsveitar - 436
Fundargerð 436. fundar Skipulagsnefndar Eyjafjarðarsveitar lögð fram til kynningar.
Gefur ekki tilefni til ályktunar.
Fleira ekki gert. Fundi slitið kl. 10:15
