Fréttayfirlit

Í aðdraganda Handverkshátíðarinnar hafa íbúar Eyjafjarðarsveitar verið iðnir og fuglahræðum hefur fjölgað svo um munar. Form og efnisval er ólíkt og stærsta hræðan er um 6 metra há. Þetta er ekki í fyrsta sinn sem íbúarnir taka þátt í að gleðja gesti sveitarinnar í aðdraganda hátíðarinnar, sem fram fer dagana 6.-9. ágúst, áður hafa þeir á svo eftirminnilega hátt skreytt póstkassana sína og prjónað klæði á kýr. Allt er þetta liður í að gera heimsókn í Eyjafjarðarsveit og á Handverkshátíðina enn skemmtilegri.

Nú er aðeins hálfur mánuður í Handverkshátíð 2015. Sýnendur eru í óða önn við undirbúning sinn og í næstu viku leggjum við aðstandendur lokahönd á sýningarsvæðið sjálft. Hátíðin er með síður á Facebook og Instagram þar sem nýtt efni er sett inn á hverjum degi. Vertu vinur okkar þar og fylgstu vel með okkur í aðdragandanum og á hátíðinni sjálfri. Hlökkum til að taka á móti þér dagana 6.-9. ágúst.

Leikskólinn Krummakot í Eyjafjarðarsveit óskar eftir að ráða starfsmann í ræstingar. Um er að ræða 50% starf á dagvinnutíma. Krummakot er þriggja deilda leikskóli staðsettur í Hrafnagilshverfinu, 10 km sunnan Akureyrar. Fjöldi nemenda er rúmlega fimmtíu og deildir aldursskiptar. Verið er að innleiða Jákvæðan aga og markvisst unnið með læsi, dygðir, umhverfisstarf, hreyfingu, myndlist og tónlist. Umsóknarfrestur er til 4. ágúst n.k.

Enn eitt árið hafa íbúar Eyjafjarðarsveitar gert sitt til að gleðja gesti sveitarinnar í aðdraganda Handverkshátíðarinnar sem fram fer dagana 6.-9. ágúst. Í ár hafa þeir útbúið fuglahræður og komið þeim fyrir svo þær sjást frá þjóveginum. Það er gaman að sjá hversu fjölbreyttar þær eru. Sjá má litla fjölskyldu sem nýtur veðursins og grillar, ein er við björgunarstörf klædd búningi Hjálparsveitarinnar Dalbjargar í Eyjafjarðarsveit, virðulegir bændur, suðræn og seyðandi dama og svei mér þá ef grýla er ekki þarna einhvernstaðar með óþæg börn í poka og svo er það tröllskessan Kvörn. Tilvalið að keyra í sveitina og reyna að koma auga á fuglahræðurnar 14. Hlökkum til að sjá ykkur.

Sveitarstjórn Eyjafjarðarsveitar samþykkti þann 10. júní 2015 að auglýsa tillögu að deiliskipulagi fyrir efnistökusvæði í landi Munkaþverár skv. 1. mgr. 41. gr. skipulagslaga nr. 123/2010. Tillagan fellur undir lög um umhverfismat áætlana nr. 105/2006 og fylgir henni umhverfisskýrsla. Tillagan mun liggja frammi á skrifstofu sveitarfélagsins frá 24. júní 2015 til og með 5. ágúst 2015.

Sveitarstjórn Eyjafjarðarsveitar samþykkti á fundi þann 27. maí að gefa starfsmönnum sveitarfélagsins frí eftir hádegi þann 19. júní til að taka þátt í skipulögðum hátíðarhöldum þegar þess verður minnst að 100 ár eru liðin frá því að konur fengu kosningarétt. Sveitarstjóri

Fundur sveitarstjórnar verður haldinn föstudaginn 12. júní í fundarstofu 1, Skólatröð 9, kl. 20:00

465. fundur sveitarstjórnar Eyjafjarðarsveitar verður haldinn í fundarstofu 2, Skólatröð 9, miðvikudaginn 10. júní 2015 og hefst kl. 15:00

Hið árlega kvennahlaup verður haldið 13. júní. Hlaupið verður frá Íþróttamiðstöð Eyjafjarðarsveitar og boðið verður upp á að hlaupa tvær vegalengdir, 2,5 km og 5 km. Skráning hefst kl.10.30 og hlaup kl.11.00. Þátttökugjald er 1.500 kr. fyrir fullorðna og 1.000 kr. fyrir börn. Innifalið í verðinu er Kvennahlaupsbolurinn og verðlaunapeningur.

Opinn íbúafundur var haldinn í Laugarborg þriðjudagskvöldið 26. maí þar sem samningur við Tengir hf. um uppbyggingu ljósleiðaranetsins var kynntur. Mikil ánægja kom fram varðandi þessa framkæmd. Á fundinum kom fram að Síminn mun ekki geta boðið upp á dreifingu sjónvarpsefnis í gegnum ljósleiðarann nema að settur verði upp sérstakur endabúnaður. Fundurinn skoraði á Símann að beita sér fyrir því að strax í sumar verði settur upp nauðsynlegur búnaður svo íbúar sveitarfélagsins geti tekið við sjónvarpsefni Símans líkt og frá öðrum dreifingaraðilum sjónvarpsefnis. Sveitarstjórn tekur undir þessa áskorun íbúafundarins og skorar á þá sem málið varðar að bregðast strax við.