Fréttayfirlit

Nú er varptíminn í algleymingi og vert að minna á 9. og 15. gr. samþykktar um hunda og kattahald, en þar segir: „Eigendum og forráðamönnum katta ber að taka tillit til fuglalífs á varptíma, t.d. með því að takmarka útiveru þeirra og eftir atvikum hengja á þá bjöllu.” Í samþykktinni kemur einnig m.a. fram að eigendur eða umráðamenn katta skulu gæta þess að dýrin valdi ekki hættu, óþægindum, óþrifnaði, óöryggi eða verði mönnum til óþæginda á annan hátt. Ef dýrin valda nágrönnum eða öðrum ónæði, óþrifum eða tjóni þá er eiganda eða umráðamanni skylt að leita leiða til að koma í veg fyrir slíkt. Sé ónæði af völdum katta má hafa samband í vaktsíma 463-0615. Sveitarstjóri.

Til að hvetja til góðrar umhirðu og umgengni um náttúru okkar hefur járna- og timburgámum verið komið fyrir hjá Vatnsenda og í Djúpadal við gatnamót Dalsvegar og Finnastaðavegar,. Hvetjum við íbúa til að nýta sér þessa þjónustu og brýnum jafnframt fyrir notendum þeirra að flokka rétt í þá. Ef við flokkum rétt þá fara gámar á Akureyri þar sem efnið fer í rétt ferli og endurvinnslu eftir því sem við á. Ef við flokkum ekki rétt og mismunandi flokkar blandast í gámum þá eru gámarnir fluttir um þrjú hundruð kílómetra leið og efnið fer í urðun með tilheyrandi umhverfisspori og miklum kostnaði. Á þetta einnig við um þegar hent er í gámana á gámasvæðinu. Gott er að hafa þetta í huga núna við endurnýjun girðinga en þar þarf að aðskilja timbur frá girðingu áður en efnið fer hvort í sinn gám. Fegrum umhverfið og flokkum rétt. Finnur Yngvi Kristinsson, sveitarstjóri.

Nú er að um að gera að láta drauminn rætast ..... Tónlistarskóli Eyjafjarðar býður 16 ára og eldri upp á ókeypis prufutíma í söng núna fyrir 1. júní hjá Heimi Ingimarssyni. Áhugasamir sendi póst á te@krummi.is eða hringi í síma 898-0525 (Guðlaugur).

Sumarið er alveg á næsta leiti og því fylgir að bókasafnið fer í sumarfrí. Síðasti útlánadagur safnsins verður þriðjudaginn 31. maí. Þá er opið frá kl. 14:00-17:00. Þangað til er opið eins og venjulega: Þriðjudaga kl. 14:00-17:00. Miðvikudag kl. 14:00-17:00. Fimmtudaga kl. 14:00-18:00. Föstudaga kl. 14:00-16:00. Gleðilegt sumar.

Leikskólinn Krummakot auglýsir eftir sparkbílum sem og búdóti eða gömlum pottum, pönnum, sleifum, kötlum og allskonar eldhúsdóti sem hægt er að nýta í útiveru. Tökum við slíku fegins hendi núna þegar að sumrar.

Vegna viðhalds og námskeiða starfsfólks verður Íþróttamiðstöðin (sundlaug og íþróttahús) lokuð 23.-25. maí (mánudag-miðvikudags). Opnum svo aftur kl. 10:00 á uppstigningardag, fimmtudaginn 26. maí. Forstöðumaður Íþróttamiðstöðvar.

Við sveitarstjórnarkosningar 14. maí 2022 voru 821 á kjörskrá. 587 greiddu atkvæði eða 71,5%, af þeim voru 11 auðir og 3 ógildir. Atkvæðin skiptust þannig: F-listi fékk 338 atkvæði og 4 menn kjörna K-listi fékk 235 atkvæði og 3 menn kjörna Í nýrri sveitarstjórn eiga því sæti: Hermann Ingi Gunnarsson F-lista Ásta Arnbjörg Pétursdóttir K-lista Linda Margrét Sigurðardóttir F-lista Sigurður Ingi Friðleifsson K-lista Kjartan Sigurðsson F-lista Sigríður Bjarnadóttir K-lista Berglind Kristinsdóttir F-lista  

Kjörstaður í Eyjafjarðarsveit verður í Hrafnagilsskóla laugardaginn 14. maí. Kjörfundur hefst kl. 10:00 og honum lýkur kl. 22:00. Þeim sem eiga erfitt með gang er heimilt að aka út að skóla. Á kjörstað gerir kjósandi grein fyrir sér með framvísun skilríkja eða á annan fullnægjandi hátt. Stafræn skilríki í síma þurfa að hafa verið uppfærð eftir 6. apríl 2022. Atkvæði verða talin á kjörstað eftir að kosningu lýkur. Á kjördegi hefur kjörstjórn aðsetur í Hrafnagilsskóla, sími 464-8100 eða 894-1372. Kjörstjórnin í Eyjafjarðarsveit, Einar Grétar Jóhannsson, Helga Hallgrímsdóttir og Þór Hauksson Reykdal.

Ákveðið hefur verið að ráðast í endurskipulagningu á Handverkshátíðinni en félögin sem að hátíðinni standa finna fyrir breyttu landslagi eftir heimsfaraldur Covid.

Sveitarstjórn Eyjafjarðarsveitar samþykkti á fundi sínum þann 4. maí 2022 sl. að vísa deiliskipulagstillögu fyrir íbúðarsvæði í landi Brúarlands í kynningarferli skv. 4. mgr. 40 gr. skipulagslaga nr. 123/2010.