Fréttayfirlit

Í kjölfar mikillar umræðu um óhollustu sykurs hefur Íþróttamiðstöð Eyjafjarðarsveitar tekið þá ákvörðun að selja ekki sælgæti fyrr en eftir kl. 16.30 virka daga. Þá hafa börnin okkar lokið skóla, vistun auk flestra íþróttaæfinga. Vonum við að þetta hjálpi okkur í baráttunni við sykurpúkann og þannig getum við í sameiningu öðlast enn heilabrigðara samfélag.

Handverkshátíðin við Hrafnagilsskóla verður haldinn í 24. sinn dagana 4. – 7. ágúst næstkomandi. Á sama tíma fer fram Landbúnaðarsýning þar sem söluaðilar og bændur munu taka höndum saman um að kynna helstu nýjungar í íslenskum landbúnaði. Samhliða sýningunum verða hinar ýmsu uppákomur í sveitinni bæði innan sýningarsvæðisins og utan þess. Framkvæmdastjórar sýningarinnar eru Katrín Káradóttir og Guðný Jóhannesdóttir og lofa þær stöllur að innan svæðisins muni öll fjölskyldan finna eitthvað við sitt hæfi. Það er því um að gera að taka helgina frá enda búið að panta hið rómaða eyfirska blíðviðri.

Fimmtudaginn 14. janúar var kjöri íþróttamanns UMSE lýst í Laugaborg í Eyjafjarðarsveit. Veittar voru viðurkenningar til yfir 30 íþróttamanna fyrir árangur sinn á árinu 2015. Ólöf María Einarsdóttir, golfkona, var kjörin íþróttamaður UMSE 2015. Þetta er annað árið í röð sem hún hlýtur titilinn. Við þetta tækifæri var undirritaður samstarfssamningur milli UMSE og Eyjafjarðarsveitar sem gildir til næstu fjögurra ára. Það voru Sigurður Eiríksson, varaformaður UMSE og Karl Frímannsson sveitarstjóri Eyjafjarðarsveitar sem undirrituðu samninginn.

Umsókn um barnalífeyri vegna náms eða starfsþjálfunar og framlag vegna náms eða starfsþjálfunar fer fram rafrænt á vef Tryggingastofnunar, tr.is, Mínar síður. Með umsókn þarf að fylgja skólavottorð sem sýnir í hve mikið nám umsækjandi er skráður. Barnalífeyri vegna náms eða starfsþjálfunar þarf að sækja um á hverri önn og á skólavottorði þarf að koma fram námsárangur á síðustu önn ásamt staðfestingu á fjölda eininga á næstu önn. Mánaðarleg upphæð greiðslna á árinu 2016 er 29.469 kr.

Vegagerðin ráðgerir að hefja snjómokstur sunnan Miðbrautar við Hrafnagilshverfi fyrir hádegi í dag, 14.janúar 2016.

Óvísst er hvort að Gámaþjónustan geti tæmt endurvinnslutunnur í dag sökum mikillar hálku. Ef það tekst ekki verður það gert við fyrsta tækifæri.

Eyjafjarðarsveit sendir íbúum sveitarfélagsins sem og landsmönnum öllum hugheilar jóla- og nýjárskveðjur með þökk fyrir ánægjuleg samskipti á árinu sem er að líða.

Nú er til kynningar breyting á aðalskipulagi Eyjafjarðarsveitar 2005-2025 þar sem legu gönguleiðar GL-1 og reiðleiðar HL-1 (héraðsleið) sem liggja frá Akureyri að Hrafnagilshverfi er breytt á hluta leiðarinnar. Kynningin er í samræmi við 2. mgr. 30. gr. skipulagslaga nr. 123/2010.

Fjárhagsáætlun Eyjafjarðarsveitar fyrir árið 2016 og árin 2017 - 2019 var tekin til síðari umræðu 11. desember síðast liðinn. Áætlunin endurspeglar sterka stöðu Eyjafjarðarsveitar en samhliða henni var fjárfestingar- og viðhaldsáætlun samþykkt fyrir árið 2016 kr. 47,5 millj. og fyrir árin 2017 - 2019 kr. 168 millj.

Vegna færðar og veðurs hafa orðið tafir á sorphirðu, Gámaþjónustan stefnir að því að klára verkið eftir hádegið á morgun, miðvikudaginn 9.12.2015.