Fréttayfirlit

Dagana 10.–15. maí stendur yfir skráning nýrra nemenda í Hrafnagilsskóla. Foreldrar og forráðamenn eru beðnir um að skrá nemendur í verðandi 1. bekk (börn fædd 2018) og einnig aðra nýja nemendur sem væntanlegir eru í skólann næsta haust. Á sama tíma er tekið á móti tilkynningum um flutning nemenda af svæðinu. Þeir sem ætla að notfæra sér frístund næsta vetur (fyrir nemendur í 1.- 4. bekk) eru beðnir að tilkynna það þessa sömu daga, skráning er ekki bindandi. Skráning fer fram hjá ritara skólans á virkum dögum milli kl. 9:00-14:00 í síma 464-8100. Skólastjóri.

Hrafnagilsskóli er grunnskóli í dreifbýli um 12 km fyrir innan Akureyri og eru um 180 nemendur í skólanum. Skólinn hefur skapað sér afar gott orðspor í gegnum tíðina og samanstendur af frábærum mannauði. Heimasíða Hrafnagilsskóla er www.krummi.is. Grunnskólakennari á miðstig Óskum eftir að ráða grunnskólakennara í 80 - 100% starfshlutfall frá 1. ágúst 2024. Um er að ræða umsjónarkennarastöðu á miðstigi. Grunnskólakennari á unglingastig Óskum eftir að ráða grunnskólakennara í 100% starfshlutfall frá 1. ágúst 2024. Starfið felur aðallega í sér stærðfræðikennslu og umsjón með bekk á unglingastigi. Skólaliði og starfsmaður í frístund Inn í öflugan og skemmtilegan starfsmannahóp Hrafnagilsskóla vantar skólaliða og starfsmann í frístund næsta skólaár. Forstöðumaður frístundar Óskum eftir að ráða forstöðumann frístundar í hlutastarf frá 1. ágúst 2024. Forstöðumaður frístundar starfar undir stjórn skólastjóra. Hann ber faglega ábyrgð á starfsemi frístundar, er verkstjóri og næsti yfirmaður starfsmanna í frístund. Hann hefur umsjón með skráningu barna og stendur skil á innheimtulistum. Uppeldismenntun er æskileg.

Dagana 13.-18. maí munu starfsmenn frá umhverfisverkfræðistofunni ReSource International gera lekaleit á hitaveitu fyrir hönd Norðurorku. Lekaleitin fer m.a. fram í Eyjafjarðarsveit og þá í Hrafnagilshverfi, á Kristnesi og austan frá Kaupangi fram að Stóra Hamri. Lekaleitin verður gerð með drónum þar sem teknar verða hitamyndir úr +50 m hæð vegna mögulegra leka á hitaveitulögnum sem og til að varpa ljósi á mögulegar viðhaldsþarfir. Myndir eru teknar úr þónokkurri hæð svo ekki er hægt að greina neina persónugreinanlega hluti á þeim. Gögnin munu afhendast Norðurorku og ekki fara í dreifingu út á við. ReSource International mun leitast eftir því að framkvæma verkið með öryggi og hag íbúa að leiðarljósi og þakkar fyrirfram sýndan skilning og þolinmæði. Norðurorka.

Sveitarstjórn Eyjafjarðarsveitar hefur ákveðið að ráða Ólöfu Ásu Benediktsdóttur í stöðu skólastjóra Hrafnagilsskóla og mun hún taka formlega við stöðunni þann 1.ágúst 2024. Ólöf Ása hefur starfað við Hrafnagilsskóla frá því árið 2005, lengst af sem umsjónarkennari en veturinn 2016-2017 leysti hún af sem aðstoðarskólastjóri. Ólöf Ása lauk grunnskólakennaraprófi B.ed. af raungreinasviði árið 2005 frá Háskóla Akureyrar og klárar í vor meistarapróf í menntavísindum með áherslu á stjórnun og forystu í lærdómssamfélagi frá sama skóla. Auk þessa hefur Ólöf Ása starfað sem stundakennari við Háskólann á Akureyri ásamt því að starfa fyrir Menntamálastofnun við endurskoðun aðalnámskrár grunnskóla. Sveitarstjórn staðfesti ráðninguna á fundi sínum þann 2.maí að fenginni umsögn skólanefndar. Í bókun sveitarstjórnar koma jafnframt fram þakkir til Hrundar Hlöðversdóttur fyrir þá góðu vinnu sem hún hefur lagt af mörkum fyrir skólasamfélag Eyjafjarðarsveitar undanfarin ár. Óskar sveitarstjórn henni alls hins besta.

Þann 29.apríl afhenti Atvinnu- og umhverfisnefnd tvenn umhverfisverðlaun, annarsvegar í flokki einstaklinga og hinsvegar í flokki atvinnustarfsemi. Vilborg Þórðardóttir að Ytra-Laugalandi fékk verðlaun í hópi einstaklinga, Skógarböðin í hópi atvinnustarfsemi.

Tveir kennarar í 100% Leikskólakennara eða starfsmann með aðra háskólamenntun sem nýtist í starfi. Um er að ræða 100% ótímabundna stöður á deild með yngri börnum. Æskileg starfsbyrjun er sem fyrst eða eftir samkomulagi.

Leikskólinn er í Hrafnagilshverfi, aðeins tíu kílómetra sunnan Akureyrar. Á Krummakoti er 81 barn sem eru á aldrinum 1 - 6 ára. Svæðið í kringum skólann er sannkölluð náttúruperla, útikennslusvæðið stórt og gönguleiðir víða. Við leggjum áherslu á jákvæðan aga, söguaðferð og útikennslu. Starfsmannahópurinn á Krummakoti er öflugur og stendur þétt saman. Vegna framkvæmda við byggingu nýs og glæsilegs leikskólahúsnæðis fyrir leikskólann Krummakot auglýsum við eftir 50% stöðu aðstoðarleikskólastjóra til og með 31.júlí 2025. Um er að ræða 100% starf sem skiptist í 50% stöðu aðstoðarleikskólastóra og 50% önnur störf innan leikskólans.

Í tilefni Stóra Plokkdagsins sunnudaginn 28. apríl, vill atvinnu- og umhverfisnefnd hvetja íbúa Eyjafjarðarsveitar til átaks í ruslatínslu og almennri tiltekt. Víða má finna rusl í vegköntum, plast á girðingum og fleira.

Þann 18.apríl síðastliðinn rann út umsóknarfrestur vegna stöðu skólastjóra Hrafnagilsskóla. Alls sóttu fjórir einstaklingar um stöðuna en ein umsókn var dregin til baka.

Verður haldið á Þórsvellinum, þ.e. frjálsíþróttavellinum við Bogann, á Akureyri, miðvikudaginn 1. maí og hefst kl 12:00 Leikskólahlaup: 400m - einn hringur á vellinum Grunnskólahlaup: Hægt að velja um 2 km eða 5 km. 5 km hlaup: Fyrir fólk á öllum aldri - verðlaun fyrir fyrstu þrjú sætin í nokkrum aldursflokkum. Allir skráðir þátttakendur fá verðlaunapening, pizzu frá Sprettinum og hressingu frá MS að hlaupi loknu. Keppendur þarf að skrá á netinu fyrir keppnisdag, en keppnisgögn (númer) og sundmiðar verða afhent í Hamri þriðjudaginn 30. apríl milli kl. 16:00 og 18:00 og í Hamri á keppnisdag frá 9:30 - 11:30. Hlaupið er keppni á milli grunnskóla þar sem keppt er um hlutfallslega þátttöku og sá skóli sem sigrar hlýtur verðlaunabikar. Allir krakkar fá frítt í hlaupið, þökk sé Akureyrarbæ, Þelamerkurskóla, Eyjafjarðarsveit og Svalbarðsstrandarhrepp. Auk fyrrnefndra sveitarfélaga og skóla, styrkir Sprettur-inn, MS og stéttarfélögin á Eyjafarðarsvæðinu hlaupið, kunnum við þeim bestu þakkir fyrir. Frekari upplýsingar og myndir af hlaupaleiðum má finna hér: Nánari upplýsingar - 1. maí hlaup Við hvetjum alla til að skrá sig og sína í hérna: Skráning í 1. maí hlaup