Fréttayfirlit

Sumarlokun hjá Eyjafjarðarsveit og Skipulags- og byggingarfulltrúa. Skrifstofur Eyjafjarðarsveitar og Skipulags- og byggingarfulltrúa Eyjafjarðar verða lokaðar frá 20. júlí til og með 3. ágúst vegna sumarleyfa starfsfólks.

Laus er staða frístundaleiðbeinanda við Félagsmiðstöðina Hyldýpi í Eyjafjarðarsveit. Hyldýpi heldur úti frístundastarfi fyrir börn og unglinga á mið- og unglingastigi Hrafnagilsskóla. Viðkomandi þarf að geta hafið störf 1. september 2026.

Íþróttavika Evrópu verður haldin 23. – 30. september eins og undanfarin ár. Líkt og áður mun sveitarfélagið halda utan um dagskrá og kynningarmál en áfram verður leitað til þeirra sem halda úti hreyfi- og/eða vellíðunarúrræðum hér í sveit varðandi framkvæmd einstakra viðburða. Íþróttavikan er haldin út um alla Evrópu og er styrkt af Evrópusambandinu í gegn um ÍSÍ og mun Eyjafjarðarsveit sækja um styrk til verkefnisins eins og undanfarin ár. Í fyrra var haldið svokallað „virkniþing“ í fyrsta skiptið og í ár verður haldið áfram að þróa þann viðburð. Þar var einstaklingum og félagasamtökum sem bjóða upp á hreyfi- og vellíðunarúrræði í Eyjafjarðarsveit boðið að kynna sína starfsemi auk þess sem viðburðurinn var útvíkkaður til annarra frjálsra félagasamtaka líka. Þeir sem hafa áhuga á að taka þátt í íþróttavikunni er bent á að senda tölvupóst á Karl Jónsson Íþrótta- og tómstundafulltrúa á netfanginu karlj@esveit.is. Einnig má koma hugmyndum að viðfangsefnum íþróttavikunnar þangað líka og sérstaklega varðandi dagskrá virkniþingsins þar sem allar hugmyndir eru vel þegnar.

Sveitarstjórn Eyjafjarðarsveitar hefur ákveðið að ráða Jón Björn Hákonarson í stöðu sveitarstjóra. Jón Björn hefur áratuga reynslu af störfum á vettvangi sveitarstjórnarmála og víðtæka þekkingu á stjórnsýslu, stefnumótun og rekstri sveitarfélaga. Tekur hann við starfinu þann 1. ágúst næstkomandi.

679. fundur sveitarstjórnar Eyjafjarðarsveitar verður haldinn í fundarstofu 2, Skólatröð 9, fimmtudaginn 18. júní 2026 og hefst kl. 08:00

Dagana 26.–28. júní verður líf og fjör í Eyjafjarðarsveit þegar Landsmót UMFÍ 50+ fer fram. Fjölmargir gestir munu sækja sveitarfélagið heim og sunnudaginn 28. júní mun Ungmennafélagið Samherjar fagna 30 ára afmæli sínu með viðburðum sem verða hluti af hátíðarhelginni. Verður það auglýst nánar síðar.

FUNDARBOÐ 678. fundur sveitarstjórnar Eyjafjarðarsveitar verður haldinn í fundarstofu 2, Skólatröð 9, fimmtudaginn 4. júní 2026 og hefst kl. 08:00.

Lokadagur nemenda þetta skólaárið er fimmtudagurinn 4. júní og þann dag keyra skólabílar heim kl. 13:00. Frístund er opin fyrir þá sem þar eru skráðir og er það síðasti opnunardagur þessa skólaárs. Skólaslitin fara fram í íþróttahúsinu föstudaginn 5. júní kl. 18:00. Fólk er beðið að huga að því hvort skólabækur eða bókasafnsbækur hafi gleymst heima og koma þeim til skila. Einnig er hægt að skila inn Unicef áheitum. Óskilamunir verða til sýnis og eru allir hvattir til að kíkja á þá. Að sumarleyfi loknu verður Hrafnagilsskóli settur mánudaginn 24. ágúst kl. 13:00 og kennsla hefst samkvæmt stundaskrá þriðjudaginn 25. ágúst. Skólastjórnendur

Ákveðið hefur verið að beitartímabil sauðfjár hefjist 15. júní árið 2026 og lýkur því þann 1. október samkvæmt samþykktum um búfjárhald. Beitartímabil hrossa hefst þann 20.júní 2026 og lýkur því þann 10.janúar á næsta ári.

Sumaropnunartími sundlaugarinnar tekur gildi laugardaginn 30. maí. Á virkum dögum er opið frá kl. 6.30 - 22.00 Um helgar er opið frá kl. 10.00 - 20.00 Vakin er athygli á því að nú er syndum fjórðu bekkingum, þau sem verða 10 ára á árinu, heimilt að koma í sund án fylgdar. Mikilvægt er að forráðamenn ræði við sín börn um mikilvægi þess að hlíta þeim öryggisreglum sem gilda og fara eftir fyrirmælum starfsfólks.